რუსეთის ავიაციის დახმარებით სირიის არმიამ პირველ მნიშვნელოვან წარმატებას მიაღწია

მსოფლიო - 17:15, 11 Nov, 2015

3756

სირიის არმიამ ალეპოს პროვინციაში პირველ სტრატეგიულ წარმატებას მიაღწია. სამთავრობო ძალებმა, რომელსაც რუსეთის ავიაცია ეხმარება, "ისლამური სახელწმიფოს" მებრძოლთა ალყა გაარღვიეს და კვეირასის ავიაბაზაზე შევიდნენ. მის დაკავებას ტერორისტები სამი წლის განმავლობაში უშედეგოდ ცდილობდნენ.

ბაზაზე მხოლოდ 1000 სამხედრო იმყოფებოდა და მთელი ამ ხნის განმავლობაში ტერორისტების თავდასხმებს წარმატებით იგერიებდა. პარალელურად, რუსეთმა გაეროს სირიის კრიზისის მოგვარების ახალი გეგმა შესთავაზა. დოკუმენტის თანახმად უნდა განისაზღვროს 18 თვიანი გარდამავალი პერიოდი, რის შემდეგაც არჩევნები ჩატარდება.

შეგახსენებთ, რუსულმა ავიაციამ სირიაში საჰაერო ოპერაცია 30 სექტემბერს დაიწყო. მედიაში გავრცელებული ინფორმაციით, რუსეთმა, რომელიც ავიაიერიშებს ბაშარ ასადის თხოვნის საფუძველზე ახორციელებს, სამიზნედ არა ISIS პოზიციები, არამედ ბაშარ ასადისადმი ოპოზიციურად განწყობილი ძალების პოზიციები შეარჩია. ოფიციალური მოსკოვი ბრალდებებს კატეგორიულად უარყოფს.

ცოტა ხნის წინ, აშშ-ის სახელმწიფო მდივნის თანაშემწემ ვიქტორია ნულანდმა რუსეთი სირიის პროვინცია ჰომსსა და ჰამასში სახმელეთო არტილერიის განლაგებაში დაადანაშაულა.

გავრცელებული ცნობით, ამ დროისთვის სირიაში 4 000 სამხედრო იმყოფება.