მსოფლიო ანტიდოპინგური სააგენტო რუსეთის მძლეოსნობის ფედერაციის დისკვალიფიკაციას ითხოვს

მსოფლიო - 14:42, 10 Nov, 2015

1324

მსოფლიო ანტიდოპინგური სააგენტოს (WADA) რუსეთის მძლეოსნობის ფედერაციის დისკვალიფიკაციასა და მოსკოვის ანტისადოპინგო სააგენტოსთვის აკრედიტაციის ჩამორთმევას ითხოვს. ამის შესახებ სპეციალური კომისიის ანგარიშშია საუბარი. 323-გვერდიანი ანგარიშის თანახმად, მოსკოვის ანტისადოპინგო ლაბორატორიამ 2014 წელს 1417 დოპინგ-სინჯი გაანადგურა და რუსი სპორტსმენების მხრიდან დარღვევების ფაქტები დამალა.
დოკუმენტში ნათქვამია, რომ მანიპულაციები რუსეთის სპორტის მინისტრის ვიტალი მუტკოს ბრძანებით ხდებოდა, რუსეთის უშიშროების ფედერალური სამსახური კი, ქვეყანაში დოპინგის სისტემატური გამოყენების ფაქტებს მალავდა და ანტისადოპინგო ლაბორატორიის საქმიანობაში ერეოდა.
კომისია ასევე, ხუთი რუსი სპორტსმენისა და ხუთი მწვრთნელის სამუდამო დისკვალიფიკაციას ითხოვს.

აღნიშნულ ანგარიშს რუსეთის პრეზიდენტის პრეს-სპიკერი, დიმიტრი პესკოვი გამოეხმაურა და ბრალდებებს უსაფუძვლო უწოდა.

„საქმე იმაშია, რომ თუკი რაიმე ბრალდებები არსებობს, მტკიცებულებებით უნდა იყოს გამყავრებული. ამ დრომდე არანაირი დამაჯერებელი მტკიცებულება არ გახმოვანებულა. ისინი უსაფუძვლოა“ - განაცხადა პესკოვმა.

თავისმხრივ, რუსეთის პრეზიდენტმა ვლადიმერ პუტინმა სადოპინგო სკანდალთან დაკავშირებით გამოძიების ჩატარება მოითხოვა. მისი თქმით, ვითარება საერთაშორისო ანტისადოპინგო სტრუქტურებთან თანამშრომლობას მოითხოვს.