ეგვიპტეში ჩამოვარდნილი რუსული ლაინერის ბორტზე აფეთქება მოხდა

მსოფლიო - 11:25, 07 Nov, 2015

3302

ეგვიპტში, სინაის ნახევარკუნძულზე ჩამოვარდნილი რუსული სამგზავრო ლაინერის - A321-ის ბორტზე აფეთქება მოხდა და ამას შავი ყუთების ჩანაწერები ადასტურებს.

როგორც „ფრანს 2“ ერთ-ერთ გამომძიებელზე დაყრდნობით იტყობინება, შავი ყუთების ჩანაწერში აფეთქების ხმა ისმის, რომელიც ძრავის წყობიდან გამოსვლას არ უკავშირდება.

„შავი ყუთის ჩანაწერების გაშიფვრისას, აფეთქების ხმა ისმის“ - აცხადებს გამომძიებელი, თუმცა ტერაქტის ვერსიას გადაჭრით ვერ ადასტურებს.

გამოცემა „კომრსანტი“ კი იტყობინება, რომ ეგვიპტელი ექსპერტები ბომბის აფეთქებას ადასტურებენ. როგორც გამოცემა წყაროზე დაყრდნობით იტყობინება, ბომბი შესაძლოა საბარგო განყოფილებაში ან კუდის ნაწილში იყო მოთავსებული. გამოცემის თანახმას, ექსპერტთა ვარაუდიდ, ბომბი სენსორული იყო, რომელიც სიმაღლეზე წნევის ვარდნასთან ერთად აქტიურდებოდა. მეორე ვერსიით, კი შესაძლოა ბომბი ტაიმერზე ყოფილიყო და თვითმკვლელი ტერორისტი ბორტზე საერთოდ არ იმყოფებოდა.

შეგახსენებთ, რუსული ავიაკომპანია "კოგალიმავიას" ლაინერი Airbus А-321 ეგვიპტის ტერიტორიაზე, სინაის ნახევარკუნძულზე 31 ოქტომბერს ჩამოვარდა.

თვითმფრინავი აფრენიდან დაახლოებით 23 წუთში რადარებიდან გაუჩინარდა. ლაინერი შარმ ელ-შეიხი-სანკტ-პეტერბურგის რეისს ასრულებდა.

ავიაკატასტორისას ბორტზე 224 ადამიანი - 217 მგზავრი, მათ შორის 17 ბავშვი და ეკიპაჟის 7 წევრი იმყოფებოდა. ყველა მათგანი დაიღუპა.

ავიაკატასტროფის მიზეზები ჯერჯერობით უცნობია. ერთ-ერთი ვერსიის თანახმად თვითმფრინავი ტერორისტების სამიზნე გახდა. არსებობს ვარაუდი ტექნიკური გაუმართაობის შესახებაც. კიდევ ერთი ვერსიის თანახმად, თვითმფრინავი ჩამოვარდნამდე ჰაერში დაიშალ, რაც შესაძლოა გარე ეფექტების ზემოქმედებით ყოფილიყო გამოწვეული.

ბორტზე ბომბის არსებობის შესაძლებლობა არ გამორიცხეს არც აშშ-ის პრეზიდენტმა ბარაკ ობამამ და ბრიტანეთის პრემიერ მინისტრმა, დევიდ კემერონმა.

კრემლი ტერქტის ვერსიას კატეგორიულად უარყოფს. გვრცელებული ცნობით, რუსულ მხარეს აფეთქების ვერსიის დამადასტურებელი მტკიცებულებები არ გააჩნია.