რუსული სამგზავრო ლაინერის ჩამოგდებაზე "ისლამური სახელმწიფო" პასუხისმგებლობას იღებს

მსოფლიო - 19:15, 31 Oct, 2015

17738

გავრცელებული ინფორმაციით, რუსული ავიაკომპანია "კოგალიმავიას" ლაინერი Airbus А-321 "ისლამური სახელმწიფოს" მებრძოლებმა საზენიტო რაკეტით ჩამოაგდეს.
გავლენიანი გამოცემა "როიტერი" წერს, რომ "ისლამური სახელმწიფოს" მებრძოლები სოციალურ ქსელში ავრცელებენ ინფორმაციას, რომლის მიხედვითაც ეგვიპტეში რუსული სამგზავრო თვითმფრინავი მათ ჩამოაგდეს.
გამოცემის ინფორმაციით, ტერორისტულ აქტზე პასუხისმგებლობა სინაის ნახევარკუნძულზე მოქმედმა "ისლამური სახელმწიფოს" მებრძოლებმა აიღეს.
"როიტერის" ამის დასტურად ოფიციალური განცხადება მოჰყავს, რომელიც "ისლამური სახელმწიფოს" მებრძოლებმა სოციალური ქსელებით გაავრცელეს.
"ისლამური სახელმწიფოს მებრძოლებმა პროვინცია სინაიში რუსული თვითმფრინავის ჩამოგდება შეძლეს, რომლის ბორტზეც 220 რუსი ჯვაროსანი იმყოფებოდა. მადლობა ღმერთს, ყველა მათგანი მოკლულია" - ნათქვამია განცხადებაში.

აღსანიშნავია, რომ რუსულმა თვითმფრინავმა კატასტროფა სინაის ნახევარკუნძულის იმ რაიონში განიცადა, სადაც შეიარაღებული მებრძოლები არიან გამაგრებულნი.

მედიაში გავრცელებული ცნობა რუსეთის ოფიციალურმა პირებმა უარყვეს.

ეგვიპტეში რუსული სამგზავრო თვითმფრინავის ჩამოვარდნის შედეგად ბორტზე მყოფი ყველა ადამიანი დაიღუპა. ავიალაინერის ბორტზე მყოფთა რაოდენობა 217 - ს შეადგენდა.