ოდესის სასამართლომ მიხეილ სააკაშვილის მრჩევლის სარჩელი არ დააკმაყოფილა

მსოფლიო - 13:22, 30 Oct, 2015

1938

ოდესის საოლქო ადმინისტრაციულმა სასამართლომ, ოდესის მერობის კანდიდატის, მიხეილ სააკაშვილის მრჩევლის, ალექსანდრ ბოროვიკის სარჩელი არ დააკმაყოფილა. ბოროვიკი სუვოროვის რაიონული საარჩევნო კომისიის ქმედებების უკანონოდ ცნობას, რამდენიმე საარჩევნო უბანზე არჩევნების შედეგების გაუქმებას, რამდენიმეზე კი ხმების გადათვლას ითხოვდა.

შეგახსენებთ, 25 ოქტომბერს ჩატარებული მერის არჩევნების შედეგებს ოდესის ოლქის გუბერნატორი მიხეილ სააკაშვილიც არ ეთანხმება. ოფიციალური მონაცემებით, რომელიც ადგილობრივი საარჩევნო კომისიის მიერ გამოქვეყნდა, 25 ოქტომბერს ჩატარებულ არჩევნებში ოდესის მოქმედმა მერმა, გენადი ტრუხანოვმა გაიმარჯვა, მას არჩევნებში მონაწილეთა 53 %-მა ანუ ყოველმა მეოთხე ამომრჩეველმა დაუჭირა მხარი.

გენადი ტრუხანოვის მთავარმა მეტოქემ, ალექსანდრ ბოროვიკმა ხმათა 25,7 % დააგროვა.თავად ბოროვიკი აცხადებს, რომ ტრუხანოვმა 50%-იანი ბარიერი ვერ გადალახა, ამიტომ არჩევნების მეორე ტურის დანიშვნაა საჭირო.

საააკაშვილმა პრეს-კონფერენცია გამართა, სადაც დარღვევებზე ისაუბრა, გაყალბებული ოქმები წარადგინა და განაცხადა, რომ არჩევნები გაყალბებულია და რეალურად, მეორე ტური უნდა ჩატარდეს.

29 ოქტომბერს კი, სააკაშვილი ოდესაში მხარდამჭერებს შეხვდა. შეხვედრაზე "ქურდებისა და თაღლითების" საწინააღმდეგო კომიტეტი შექმნეს.