ბექა ღვინიაშვილი მსოფლიოს ჩემპიონია

სპორტი - 20:04, 26 Oct, 2015

2164

საქართველოს ძიუდოს ეროვნული ნაკრების წევრი, 19 წლის ბექა ღვინიაშვილი ახალგაზრდებს შორის მსოფლიოს ჩემპიონი გახდა.

90 კილოგრამ წონით კატეგორიაში მოჭიდავე ღვინიაშვილმა არაბეთის გაერთიანებული საემიროების დედაქალაქ აბუ დაბიში მიმდინარე მსოფლიოს ჩემპიონატზე ახალგაზრდებს შორის ზედიზედ 5 შეხვედრა მოიგო და ხუთივე ორთაბრძოლაში მეტოქე იპონით დაამარცხა.

აღსანიშნავია, რომ მსოფლიო ძიუდოს ისტორიაში ახალგაზრდებს შორის მსოფლიოს ჩემპიონატზე ბექა ღვინიაშვილის გარდა, ორ მედალზე მეტი არავის მოუპოვებია. 2015 წელს ბექა ღვინიაშვილმა ასევე მოიგო ევროპის ჩემპიონატი ახალგაზრდებს შორის, დიდებს შორის კი საქართველოს ნაკრებთან ერთად გუნდურ შეჯიბრში ბრინჯაო აიღო.

აბუ დაბიში ღვინიაშვილმა ერთმანეთის მიყოლებით სძლია კორეელ, ირანელ, პოლონელ და გერმანელ სპორტსმენებს, ფინალში კი მან ესპანეთის სახელით მოჭიდავე ნიკოლოზ შერაზადიშვილი 43 წამში შებოჭა. ბექა ღვინიაშვილი 26 ოქტომბერს იუბილარია და 20 წლის ხდება.

მსოფლიოს ჩემპიონატზე საქართველოს ახალგაზრდულ ნაკრებს 25 ოქტომბრის მონაცემებით 1 ოქროს, 2 ვერცხლისა და 1 ბრინჯაოს მედალი აქვს მოპოვებული. ვერცხლის პრიზიორები თამაზ კირაკოზაშვილი (73 კგ) და მარიამ ჯანაშვილი (52 კგ) გახდნენ, ბრინჯაო კი ირაკლი კუპატაძემ (55 კგ) მოიპოვა.

26 ოქტომბერს მედლები მძიმე წონით კატეგორიებში (100, + 100) გათამაშდება, 27 ოქტომბერს კი გუნდური პირველობა გაიმართება, სადაც საქართველო ჩემპიონობის ერთ-ერთი მთავარი ფავორიტია.