დავით ჭაკუას ინტერპოლი ეძებს

სამართალი - 10:54, 14 Mar, 2013

652

დავით ჭაკუა ბრალდებულია საქართველოს სისხლის სამართლის კოდექსის 332-ე მუხლის 3-ე ნაწილის „ბ“ და „გ“ ქვეპუნქტებით, (სამსახურებრივი უფლებამოსილების ბოროტად გამოყენება) 25-144 პრიმა 3-ე მუხლის 2-ე ნაწილით (დამამცირებელი ან არაადამიანური მოპყრობა) 25-145-ე მუხლით, (აღმსრულებლის და თანამონაწილის პასუხისმგებლობა-დანაშაულის პროვოკაცია) 25-369 პრიმა პირველი მუხლის 3-ე ნაწილით (აღმსრულებლის და თანამონაწილის პასუხისმგებლობა-სისხლის სამართლის საქმეზე მტკიცებულებების ფალსიფიკაცია) და 372-ე მუხლის 2-ე ნაწილით (ზემოქმედების განხორციელება მოწმეზე, დაზარალებულზე, ექსპერტზე ან თარჯიმანზე) გათვალისწინებული დანაშაულების ჩადენისათვის.

საქართველოს მთავარი პროკურატურის განცხადებით, 2012 წლის 18 სექტემბერს შსს მიერ გავრცელებული პატიმართა წამების ამსახველი ვიდეომასალა ზურაბ ადეიშვილმა და სასჯელაღსრულების დეპარტამენტის იმჟამინდელმა ხელმძღვანელმა დავით ჭაკუამ დადგეს. გამოძიებით დადგინდა, რომ 2012 წლის სექტემბრის დასაწყისში, იუსტიციის იმჟამინდელი მინისტრის ზურაბ ადეიშვილისათვის ცნობილი გახდა, რომ სასჯელაღსრულების დეპარტამენტის ყოფილმა თანამშრომელმა ვლადიმერ ბედუკაძემ პატიმართა წამების ამსახველი კადრები გავრცელების მიზნით, ევროპის ერთ-ერთ ქვეყანაში გაიტანა. მოსალოდნელი სკანდალის თავიდან აცილების მიზნით, ადეიშვილმა ჭაკუასთან ერთად დანაშაულებრივი გეგმა შეიმუშავა. მათ ბედუკაძესთან დაახლოებულ პირებს - ლევან ფხალაძესა და ბორის ფარულავას მეტსახელად, „ბასტის“ და „ბუბუს“ დაავალეს, ციხეში პატიმრები ეწამებინათ, რასაც ფირზე ფარულად ასახავდნენ, ხოლო აღნიშნულს კოალიცია „ქართული ოცნების" მიერ შეკვეთილად წარადგენდნენ.

„დავით ჭაკუამ, თავის მხრივ, დაიყოლია ამავე დაწესებულების თანამშრომელი ლევან ფურცხვანიძე, რომელმაც 2012 წლის 18 სექტემბერს, გამთენისას, მოახერხა ფხალაძისა და ფარულავას დანაშაულზე პროვოცირება, ფარულად გადაიღო მათ მიერ პატიმართა ცემისა და წამების კადრები და საჯაროდ განაცხადა, რომ „ქართული ოცნების“ წარმოამდგენლებმა, ვლადიმერ ბედუკაძის მეშვეობით, 40 000 აშშ დოლარის სანაცვლოდ, შეუკვეთეს ციხეში პატიმრების ცემა და წამება“, - აღნიშნულია პროკურატურის მიერ გავრცელებულ განცხადებაში.