ტელეკომპანია "ტაბულამ" დღეს მუშაობა საგანგებო რეჟიმში დაიწყო. სახელდახელოდ მომზადებულ თოქ-შოუს თამარ ჩერგოლეიშვილი უძღვება, მისი პირველი სტუმარი კი კახა ბენდუქიძეა:

თამარ ჩერგოლეიშვილი: "განათლების მინისტრი ამბობს, რომ აქ ტრაგიკული არაფერია, ნებისმიერ დროს შესაძლოა უნივერსიტეტს აღუდგეს ავტორიზაცია და ითხოვენ, რომ არ მოხდეს საკითხის პოლიტიზირება. თუმცა საზოგადოების ის ნაწილი, რომელიც პრესასთან ამ თემაზე საუბარს არ გაურბის, თვლის, რომ ეს საკითხი წამოწყებსთანავე პოლიტიზირებული იყო. ბატონი კახა ბენდუქიძე მზად იყო განათლების სამინისტროს ნებისმიერ წარმომადგენელთან ჩართულიყო ეთერში, მარგველაშვილმა კი განაცხადა, რომ "ტაბულასთან" საქმეს არასდროს არ დაიჭერს. რიგი პირებისა კი აცხადებენ, რომ საკითხს არ იცნობენ და ამიტომ გადაცემაში ვერ მოვიდოდნენ.

კახა ბენდუქიძე: "ფაქტი მდგომარეობს იმაში, რომ ხელისუფლებაში მოსვლის დღიდან, ბატონი გიორგი მარგველაშვილი გვებრძვის და გააგრძელებს ამ ბრძოლას, მაგრამ რატომ, არ მესმის. მე ვთვლი, რომ უნივერსიტეტი არ არის ადგილი, სადაც უნდა მოხდეს პარტიული ნიშნით ხალხის გაშვება და დანიშვნა. ჩვენს უნივერსიტეტში მუშაობდა ბევრი ადამიანი, რომელიც ამ ხელისუფლებასთან დაახლოებულია და მათთან პრობლემა არასროს არ შეგვქმნია.

სექტემბერში გავიმარჯვეთ ამერიკის მთავრობის მიერ გამოცხადებულ ტენდერში, ამ პროექტის პრეზენტაციაც გავაკეთეთ, მთავრობამ ეს ყველაფერი კი გააუქმა, მხოლოდ იმიტომ რომ რაღაც არ მოეწონათ. არავითარი მიზეზი არ დასახელებულა. მათ უბრალოდ თქვეს, რომ სხვანაირად სურდათ ამ ყოველივეს გაკეთება. სამინისტროსთან ერთად, ჩვენ ასევე ოთხი კოლეჯის თანადამფინანსებლები ვართ, მაგრამ სამინისტრომ ორი კვირის წინ მოგვწერა, რომ აღარ სურთ ამ კოლეჯების თანადამფუძნებლები ვიყოთ. ბოლო შეტევა კი იყო ავტორიზაციის შეჩერება. ამ ყველაფრის მიზანი, როგორც ჩანს, ჩემი წყენინება იყო და გამოვიდა რომ ათასობით სტუდენტსა და ასეულობით თანამშრომელსაც აწყენინეს."

გადაცემის ნახვა ტელეკომპანია "ტაბულას" ეთერში ამ ბმულზე შეგიძლიათ.