ბაშარ ასადი მოსკოვში ვლადიმერ პუტინს შეხვდა

მსოფლიო - 11:19, 21 Oct, 2015

1400

სირიის პრეზიდენტი ბაშარ ალ-ასადი სამშაბათს მოსკოვს ეწვია, სადაც რუსეთის პრეზიდენტს, ვლადიმერ პუტინს შეხვდა. ამის შესახებ "რია ნოვოსტი" პუტინის პრესმდივნის, დიმიტრი პესკოვზე დაყრდნობით იტყობინება.

"გუშინ საღამოს, მოსკოვს სამუშაო ვიზიტით სირიის პრეზიდენტი ბაშარ ალ-ასადი ეწვია. მოლაპარაკებები რუსეთის პრეზიდენტ ვლადიმერ პუტინთან ვიწრო და გაფართოვებულ ფორმატში გაიმართა“ - განაცხადა პესკოვმა.

პესკოვის თქმით, გაფართოებულ ფორმატში მოლაპარაკებებს რუსეთის ხელისუფლების უმაღლესი წარმომადგენლები ესწრებოდნენ და საკმაოდ ხანგრძლივი აღმოჩნდა.

"მსჯელობის საკითხები ტერორისტულ და ექსტრემისტულ დაჯგუფებებთან ბრძოლას შეეხო. პრეზიდენტს დეტალური ინფორმაცია მიაწოდეს სირიაში არსებულ მდგომარეობასა და სამომავლო გეგმებზე. ასევე განხილულ იქნა ორმხრივი ურთიერთობის გაფართოების საკითხები“ - აღნიშნა პესკოვმა.
გამოცემის თანახმად, პესკოვს არ დაუკონკრეტებია, იყო თუ არა საუბარი ბაშარ ალ-ასადის პოლიტიკურ მომავალზე.

ამავდროულად, კრემლის ოფიციალურ საიტზე, ორი ქვეყნის პრეზიდენტის საუბრის სტენოგრამა გამოქვეყნდა, რომლის თანახმადაც შეხვედრაზე ვლადიმერ პუტინმა განაცხადა, სირია "საერთაშორისო ტერორიზმს" მარტო ებრძვის და სერიოზულ დანაკარგს განიცდის, თუმცა ბოლო პერიოდში, რუსეთის დახმარებით ამ ბრძოლაში მნიშვნელოვან დადებით შედეგებს მიაღწია. პუტინის თქმით, სიტუაცია პოლიტიკური გზით უნდა მოგვარდეს და რუსეთი მზად არის პოლიტიკურ პროცესში საკუთარი წვლილი, სხვა ქვეყნებთან ერთად შეიტანოს. თავის მხრივ, სირიის პრეზიდენტმა პუტინს დახმარებისთვის მადლობა გადაუხადა და აღნიშნა, რომ ეს დახმარება საერთაშორისო კანონმდებლობის ფარგლებში ხორციელდება.