რუსი ჩინოვნიკების მკვლელობაში ეჭვმიტანილი ამირან გიორგაძის მძღოლი პოლიციას ჩაბარდა

მსოფლიო - 10:47, 20 Oct, 2015

4004

მოსკოვის ოლქის კრასნიოგორსკის რაიონში მომხდარ ორმაგ მკვლელობაში ეჭვმიტანლი ქართველი ბიზნესმენის, ამირან გიორგაძის მძღოლი სამართალდამცავებს ჩაბარდა. ამის შესახებ „რია ნოვოსტი“ რუსეთის საგამოძიებო კომიტეტზე დაყრდნობით იტყობინება.

გამოცემის თანახმად, მძღოლის, შოთა ელიზბარაშვილის ადვოკატმა სამართალდამცავებს დაურეკა და აცნობა, რომ ელიზბარაშვილს საკუთარი ნებით საგამოძიებო ორგანოში მისვლა სურდა. მძღოლის თქმით, მკვლელობის მომენტში ის გიორგაძის გვერდით იმყოფებოდა. მკვლელობის ადგილის დატოვების შემდეგ კი, გიორგაძემ გზაში "შემთხვევით" გამვლელიც მოკლა, რამაც მძღოლი ძალიან შეაშინა და პოლიციაში მისვლა გადაწყვიტა.

მკვლელობა გუშინ მოხდა. გამოძიების წინასწარი ვარაუდით, გიორგაძე კრასნოგორსკის რაიონის ადმინისტრაციის უფროსის მოადგილესთან, იური კარაულოვთან კაბინეტში იმყოფებოდა, რა დროსაც კრასნოგორსკის ელექტროქსელების ხელმძღვანელი გიორგი კოტლიარენკო შეუერთდა. სავარაუდოდ მათ შორის სიტყვიერი დაპირისპირება მოხდა, რის შემდეგაც გიორგაძემ ცეცხლსასროლი იარაღით ორივე მათგანი სასიკვდილოდ დაჭრა. გავრცელებული ინფორმაციით, სამივე მეგობრები იყვნენ.

რუსული მედიის ინფორმაციით, გიორგაძეს კრასნოგორსკის რაიონში სამშენებლო ბიზნესით არის დაკავებული.