დიდი ბრიტანეთის თავდაცვის მინისტრის, მაიკლ ფელონის განცხადებით, სირიაში რუსეთის ქმედებები მხოლოდ კონფლიქტის ესკალაციას უწყობს ხელ.

ამის შესახებ ბრიტანული გამოცემა „ტელეგრაფი“ იტყობინება.

მინისტრის თქმით, რუსული სამხედრო ინტერვენციის შედეგად, ბოლო რამდენიმე კვირის განმავლობაში ასობით მშვიდობიანი მოქალაქე დაიღუპა.

„ასადის რეჟიმის მხარდაჭერა, ის, რასაც რუსეთი აკეთებს, კონფლიქტის მოგვარებას ართულებს. ისინი აჭიანურებენ კონფლიქტს, სამოქალაქო პირების დაღუპვა კი გრძელდება. დამოუკიდებელი ექსპერტების განცხადებით, ბოლო კვირების განმავლობაში, სირიაში რუსულ ავიაიერიშებს ასეულობით მშვიდობიანი მოსახლე ემსხვერპლა“ - განაცხადა ფელონმა.

გარდა ამისა, ბრიტანეთის თავდაცვის მინისტრმა, რუსული თვითმფრინავების შესაძლო შეტაკებების შესახებ შეშფოთება გამოთქვა.

„ამის ძალიან მეშინია. შეხედეთ, მხოლოდ ბოლოდროინდელ მოვლენებს - რუსულმა თვითმფრინავებმა ნატოს წევრი თურქეთის საჰაერო სივრცე დაარღვია. არსებობს ინციდენტების, ავარიების რისკი, რომლებმაც შესაძლოა დაძაბულობა კიდევ უფრო გააღვივოს“ - აღნიშნა გაერთიანებული სამეფოს თავდაცვის მინისტრმა.

შეგახსენებთ, რუსულმა ავიაციამ სირიაში საჰაერო ოპერაცია 30 სექტემბერს დაიწყო. მედიაში გავრცელებული ინფორმაციით, რუსეთმა, რომელიც ავიაიერიშებს ბაშარ ასადის თხოვნის საფუძველზე ახორციელებს, სამიზნედ არა ISIS პოზიციები, არამედ ბაშარ ასადისადმი ოპოზიციურად განწყობილი ძალების პოზიციები შეარჩია. ოფიციალური მოსკოვი ბრალდებებს კატეგორიულად უარყოფს.

ავიაიერიშების დაწყებიდან, რუსულმა თვითმფრინავებმა თურქეთის საჰაერო სივრცე ორჯერ დააღვია. ოფიციალურმა ანკარამ მოსკოვს ახნსა-განმარტება მოსთხოვა, პასუხად კი საგარეო საქმეთა სამინისტროს პასუხი მიიღო, რომლის თანახმადაც, ოფიციალური ანკარის საჰაერო სივრცის დარღვევა, უამინდობი გამო , შემთხვევით მოხდა.