მიგრანტთა კრიზისზე სასაუბროდ ანგელა მერკელი თურქეთს ეწვია

მსოფლიო - 12:15, 19 Oct, 2015

1342

გერმანიის კანცლერი, ანგელა მერკელი თურქეთში ჩავიდა და მიგრანტების კრიზისზე სასაუბროდ, თურქეთის პრეზიდენტ რეჯეფ თაიფ ერდოღანს შეხვდა. მერკელმა თურქეთს ევროკავშირში გასაწევრიანებლად მოლაპარაკებების განახლებისა და უვიზო რეჟიმის მისაღებად პროცესების დაჩქარების პირობა დადო, სანაცვლოდ კი ევროკავშირი თურქეთისგან ლტოლვილების შეფარებას ითხოვს. თუკი ევროპაში მიმავალი მიგრანტების ნაკადს თურქეთი შეაკავებს და საკუთარ ტერიტორიაზე დატოვებს, სანაცვლოდ 3 მილიარდ დოლარს მიიღებს. თუმცა, ოფიციალურ ანკარას საკუთარი მოთხვოვნები გააჩნია. მიგრანტების თურქეთის ტერიტორიაზე დატოვების სანაცვლოდ, ანკარამ ვიზების ლიბერალიზაციის მიღების გარანტია მოითხოვა.

ევროკავშირსა და თურქეთს შორის ვიზა ლიბერალიზაციაზე დიალოგი 2013 წლის 16 დეკემბერს დაიწყო.

ევროკავშირის წევრობაზე განაცხადი კი თურქეთმა 1987 წელს გააკეთა. 1999 წელს კი კანდიდატი ქვეყანა გახდა. 1963 წლიდან თურქეთი ორგანიზაციის ასოცირებული წევრია.

რაც შეეხება წევრობაზე დიალოგს, ევროკავშირი მთელი რიგი მიზეზები გამო რამდენიმე წლის განმავლობაში დიალოგისგან თავს იკავებდა. მიზეზებს შორის არის კვიპროსის კონფლიქტი, საბერძნეთთან ურთიერთობა, საბერძნეთისა და კვიპროსის ვეტო, ბრალდებები ადამიანის ფუნდამენტური უფლებებისა და თავისუფალი მედიის შეზღუდვის შესახებ.