სასიკვდილოდ განწირული ,,მის ევროპას“ მონანიება

სასიკვდილოდ განწირული ,,მის ევროპას“ მონანიება - რა მოხდა ათონის მთაზე

ეს საინტერესოა - 20:40, 16 Oct, 2015

38843

1930 წელს საბერძნეთში უპრეცედენტო სკანდალი მოხდა - პარიზში გამართული „,მის ევროპა 1930-ის“ გამარჯვებულმა, ცნობილი ადვოკატის შვილმა, 18 წლის ბერძენმა ალიკი დიპლარაკუმ, მრავალსაუკუნოვანი აკრძალვა დაარღვია, რომელიც ათონის მთაზე მდედრობითი სქესის წარმომადგენლების დაუშვებლობას გულისხმობს.

მისი საქმროს, ერთ-ერთი მდიდარი ბერძენი ბიზნესმენის იახტაზე სტუმრად ყოფნისას, გოგონამ მამაკაცის ტანსაცმელი მოირგო და წმინდა მთის სანაპიროზე გავიდა... მას შემდეგ, რაც ფაქტი მედიისთვის გახდა ცნობილი. საბერძნეთი მასშტაბურ სკანდალში გაეხვა. ბერძენთა ნაწილი აღფრთოვანებული იყო „მის ევროპა - 1930-ის“ საქციელით და გამარჯვებად მიიჩნევდნენ, უმრავლესობამ კი მას ზურგი აქცია და „სატანა“ უწოდეს.

ინციდენტიდან ცოტა ხანში, ალიკი მძიმედ დაავადდა და სამკურნალოდ შვეიცარიაში წავიდა. უკურნებელი სენით დაავადებული, სასოწარკვეთილი ალიკი იძულებული გახდა საკუთარ თავში ძალა მოეძებნა, ცოდვები მოენანიებინა და ათონის მთის ბერებს საჯაროდ მიტევება სთხოვა.

ამის შესახებ მოგონებებში არქიმანდრიტი გაბრიელ დიონისაცკი წერს:

„1930 წელს მე „წმინდა საზოგადოების“ წარმომადგენელი ვიყავი და ჩემს ხელში „მისს ელადის“ წერილი აღმოჩნდა, რომელიც იტყობინებოდა:

წმინდა მამებო, მინდა მთელი გულით მოვინანიო და ვაღიარო ჩემი შეცდომა, რომელიც გასულ თვეს ვატოპედის მონასტერში დავუშვი.

იმ ადგილას, ჩემი საქმროს, ბატონი მორანის გემით მივედით და როდესაც მონასტრის სიახლოვეს აღმოვჩნდით, იქ შეღწევის ბოროტმა აზრებმა შემიპყრო, მიუხედავად იმისა, რომ იქ ქალების ყოფნის აკრძალვის შესახებ ვიცოდი.

ჩავიცვლი ჩემი საქმროს ტანსაცმელი და მასთან ერთად შემოვუარე ტაძრებსა და სხვა ადგილებს, ისე რომ არავის დავუნახივარ. ძვირფასო მამებო, მას შემდეგ დავავადდი და აქ აღმოვჩნდი, შვეიცარიის სანატორიუმში, სადაც სიცოცხლისთვის ვიბრძვი, თუმცა ჯერჯერობით გაუმჯობესებას ვერ ვხედავ.

ერთს მივხვდი და დარწმუნებული ვარ, რომ ეს ღვთისმშობლის სასჯელია, რომელიც ჩემი უპატივცემულობის გამო მანახა. მე, განათლებული გოგონა ასე არ უნდა მოვქცეულიყავი. ახლა წარმოუდგენლად ვნანობ და ნეტარ ღვთისმშობელს პატიებას ვთხოვ. მომიტევეთ თქვენც, მხცოვანო მამებო ჩემი ცოდვილი სული და გთხოვთ, მიიღოთ ჩემგან 5 000 დრაქმა, რათა აღესრულოს წირვა და შენდობა ჩემი გამოჯანმრთელებისთვის.“

მამა გაბრიელი აღნიშნავს, რომ უფალმა გოგონას მომანიება მიიღო და მას ჯანმრთელობა დაუბრუნა.

მედიაში გავრცელებული ინფორმაციით, გამოჯანმრთელების შემდეგ 1945 წელს ალიკი დიპლარაკუ მეორედ გათხოვდა ინგლისელ არისტოკრატზე, ბედფორდის ჰერცოგ სერ რასელზე და გახდა ინგლისელი ლედი ალის რასელი.

„მის ევროპა 1930“ 2002 წელს 90 წლის ასაკში გარდაუცვალა. მისი პანაშვიდი ლონდონში, წმინდა სოფიას საკათედრო ტაძარში გაიმართა და ბედფორდში საგვარეულო სასაფლაოზე დაკრძალეს.