ამის შესახებ "ტელეიმედის" მიერ მომზადებულ სიუჟეტშია ნათქვამი, სადაც აგრარული უნივერსიტეტის ყოფილი ლექტორი ზურაბ ლობჟანიძე უნივერსიტეტის უკანონო გასხვისების სქემას შიფრავს.

საუბარია 1325 ჰექტარ მიწის ფართობზე, რომელიც პრეზიდენტის გადაწყვეტილებით, კახა ბენდუქიძის საკუთრება ერთი წლის წინ გახდა. პრივატიზაციის დეპარტამენტის მიერ კი ქონების საწყის ფასად 100 მილიონი ლარია მითითებული, მაშინ როცა გადახდილი თანხა ოთხ მილიონ ლარს შეადგენს. შესაძლოა საგამოძიებო სტრუქტურები აგრარული უნივერსიტეტის გასხვისების საქმით დაინტერესდნენ. 
დღეს აღნიშნულ საკითხთან დაკავშირებით სამართალდამცავი უწყებების მხრიდან კომენტარი არ გაკეთებულა.

ყოფილი ლექტორი, ზურაბ ლობჟანიძე იმ სქემაზე საუბრობს, თუ როგორ გასხვისდა აგრარული უნივერსიტეტი.

სქემის მიხედვით, 2011 წელს ეკონომიკის სამინისტრომ შპს. "აგრომედი" შექმნა, რომელიც აგრარული უნივერსიტეტის 100 პროცენტიანი წილის მფლობელი გახდა. მისი საწესდებო კაპიტალი მხოლოდ 400 ლარს შეადგენდა. მოგვიანებით ამ წილის 50 პროცენტის მფლობელი განათლების სამინისტრო, დარჩენილი 50 პროცენტის მფლობელი კი "ცოდნის ფონდი" გახდა, რომლის დამფუძნებელიც კახა ბენდუქიძეა. 
სქემის მიხედვით, განათლების სამინისტრო უარს ამბობს საკუთარ წილზე და აგრარული უნივერსიტეტის მფლობელი კახა ბენდუქიძე ხდება.

"ბატონმა დიმიტრი შაშკინმა წარმოგვიდგინა ლაშა გოცირიძე, მან გვითხრა, რომ აგრარულ უნივერსიტეტში ჩაიდება 50 მილიონიანი ინვესტიცია, რომელიც აგრარული უნივერსიტეტის განვითარებას მოხმარდებოდა და ყოველგვარ კითხვაზე პასუხის გაუცემლად დაგვტოვა. გამომდინარე იქიდან, რომ შაშკინი უკვე საქართველოში იმყოფება, მივმართავ შესაბამის სტრუქტურებს, რომ იგი აღნიშნულ საკითხთან დაკავშირებითაც დაიკითხოს", - ამბობს ლობჟანიძე.

აგრარული უნივერსიტეტის მთავარი იურისტი აღნიშნავს, რომ პრივატიზაციის პროცესში არავითარ დარღვევას არ ჰქონია ადგილი.