ნიდერლანდების უშიშროების საბჭომ, უკრაინაში “მალაიზიის ავიახაზების“ კუთვნილი ბოინგის რეის MH17 კატრასტროფის მიზეზების საბოლოო ანგარიში წარადგინა. 15თვიანი გამოძიების შედეგად დადგინდა, რომ ბოინგ 777 აღმოსავლეთ უკრაინის ტერიტორიიდან, რუსული წარმოების საზენიტო-სარაკეტო სისტემა „ბუკის“ მიერ არის ჩამოგდებული, კერძოდ, თვითმფრინავის მიმართულებით გასროლილ იქნა "9M38" ტიპის რაკეტა.

ჰოლანდიურმა საბჭომ თვითმფრინავის რეკონსტრუქცია და ტრაგედიის ელექტრონული ინსცენირება მოაწყო, რომლის თანახმადაც ავიაკატასტროფის მომენტში "ბოინგი" ტექნიკურად გამართული იყო, ხოლო „ბუკი“ ლაინერის კაბინას მარცხენა მხარეს მოხვდა. რაკეტის ფრაგმენტები ეკიპაჟის სამი წევრის სხეულშიც აღმოაჩინეს.

ჰოლანდიელი მომხსენებლის, ტიბე იუსტრას განცხადებით, იმ დროისთის „ბუკის“ ტიპის რაკეტა როგორც უკრაინული სამთავრობო ძალების, ასევე პრორუსული სეპარატისტების არსენალშიც იმყოფებოდა.

მომხსენებლმა ასევე აღნიშნა, რომ ქვეყანას სამოქალაქო თვითმფრინავებისთვის საჰაერო სივრცე დახურული უნდა ჰქონოდა და ბოინგ 777 აღმოსავლეთ უკრაინის თავზე არ უნდა აღმოჩენილიყო, მითუმეტეს, რომ ტრაგედიის დღეს იგივე რეისი 160-მა თვითმფრინავმა განახორციელა. მისი თქმით, ტრაგედიის დროს მალაიზიური ლაინერის სიახლოვეს კიდევ 3 ლაინერი მიფრინავდა.

იუსტრას თქმით, იმისთვის რომ დადგინდეს, ზუსტად რა ადგილიდან განხორციელდა გასროლა, გამოძიების ჩატარებაა საჭირო.

შეგახსენებთ, ავიაკომპანია Malaysia Airlines-ის კუთვნილმა თვითმფრინავმა კატასტროფა 2014 წლის 17 ივლისს უკრაინის ტერიტორიაზე განიცადა, რის შედეგად 298 ადამიანი, მათ შორის 18 ბავშვი გარდაიცვალა.

დამოუკიდებელი ექსპერტების მიერ ჩატარებული კვლევების თანახმად, ლაინერი პრორუსული სეპარატისტების მიერ კონტროლირებადი ტერიტორიიდან ნასროლმა რაკეტამ ჩამოაგდო. რუსი ექსპერტის გამოძიების თანახმად, კი იმ დროისთვის უკრაინის შეიარაღებული ძალების მიერ კონტროლირებადი ტერიტორიიდან იყო ნასროლი.

გასულ თვეს, ავსტრალიამ, ბელგიამ, მალაიზიამ, ბრიტანეთმა, ნიდერლანდებმა და უკრაინამ გაეროს უშიშროების საბჭოს საერთაშორისო ტრიბუნალის მოწვევის ინიციატივით მიმართეს, რათა ინციდენტთან დაკავშირებული ყველა პირი პასუხისგებაში მიეცეს, რასაც რუსეთმა ვეტო დაადო.