თურქეთის რუსეთს დაემუქრა, რომ რუსულ გაზს აღარ იყიდის. პრეზიდენტ რეჯეპ ტაიპ ერდოღანის განცხადებით, თურქეთს სხვა ქვეყნებიდანაც შეუძლია გაზის მიღება და თურქული მხარის ბოიკოტი რუსეთისთვის დიდი დანაკლისი იქნება.

მან ასევე არ გამორიცხა, რუსეთთან ატომური ელექტროსადგურის მშენებლობის შესახებ გაფორმებული კონტრაქტის გაწყვეტა.

"თუ ატომურ ელექტროსადგურ "აქუიუს" რუსები არ ააშენებენ, მას სხვები ააშენებენ" - განაცხადა ერდოღანმა.

თურქეთსა და რუსეთს შორის ურთიერთობა მას შემდეგ დაიძაბა, რაც გასულ კვირას, რუსული სამხედრო თვითმფრინავები თურქეთის საჰაერო სივრცეში ორჯერ შეიჭრნენ. პირველი შემთხვევა 3 ოქტომბერს დაფიქსირდა. თურქეთის საგარეო უწყების ცნობით, რუსულმა თვითმფრინავმა თურქეთის საჰაერო სივრცე სირიის მხრიდან დაარღვია. უწყების განცხადებით, თვითმფრინავის დაფიქსირებისთანავე თურქეთის სამხედრო უწყებამ ორი გამანადგურებელი "ეფ-16" გააგზავნა.

თურქეთის საგარეო უწყების ცნობით, მომხდართან დაკავშირებით საგარეო საქმეთა სამინისტროში რუსეთის ელჩი მიიწვიეს და საპროტესტო ნოტა გადასცეს. ოფიციალური მოსკოვის განცხადებით, შემთხვევა უამინდობის გამო მოხდა, "შემთხვევით" მოხდა.

ანალოგიური ინციდენტი დაფიქსირადა გუშინაც. ინციდენტის გამო, ოფიციალურმა ანკარამ რუსეთიდან ელჩი კიდევ ერთხელ გამოიწვია.

ინციდენტს შეერთებული შტატების სახელმწიფო მდივანი გამოეხმაურა. მისი თქმით, აღნიშნული ფაქტით ვაშინგტონი შეშფოთებულია და ეს ინციდენტი შეიძლებოდა სამხედრო თვითმფრინავის ჩამოგდებითაც დასრულებულიყო.

ნატომ კი გავრცელებულ განცხადებაში რუსეთის ქმედებას "სახიფათო და უპასუხისმგებლო" უწოდა.

ნატოს გენერალური მდივნის, იენს სტოლტენბერგის განცხადებით, რუსული სამხედრო თვითმფრინავების თურქეთის საჰაერო სივრცეში შეჭრა "შემთხვევითობას არ ჰგავს" და ამის შესახებ ალიანსს არანაირი რეალური ახსნა-განმარტება არ მიუღია.