თურქეთის პრეზიდენტის, პრეზიდენტის რეჯეპ ტაიპ ერდოღანის თქმით, თურქეთი არ აპირებს ჩუმად დააკვირდეს, როგორ არღვევს რუსეთი მის საჰაერო სივრცეს.

„თურქეთზე თავდასხმა, ნატოზე თავდასხმას ნიშნავს“ - აღნიშნა ერდოღანმა ბრიუსელში, ბელგიის პრემიერ-მინისტრთან გამართულ ერთობლოვ პრეს-კონფერენციაზე.

მან ასევე აღნიშნა, რომ მსგავსმა ინციდენტებმა შესაძლოა, თურქეთ-რუსეთის ურთიერთობა დააზარალონ.

„როგორც ცნობილია, ჩვენ რუსეთთან პოზიტიური ურთიერთობა გვაქვს. თუკი რუსეთი თურქეთის სახით მეგობარს დაკარგავს, ის ბევრს დაკარგავს და ეს უნდა იცოდეს“ - განაცხადა ერდოღანმა.

შეგახსენებთ, რუსულმა სამხედრო თვითმფრინავმა თურქეთის საჰაერო ორჯერ დაარღვია. პირველი შემთხვევა შაბათს დაფიქსირდა. თურქეთის საგარეო უწყების ცნობით, რუსულმა თვითმფრინავმა თურქეთის საჰაერო სივრცე სირიის მხრიდან დაარღვია. უწყების განცხადებით, თვითმფრინავის დაფიქსირებისთანავე თურქეთის სამხედრო უწყებამ ორი გამანადგურებელი "ეფ-16" გააგზავნა.
თურქეთის საგარეო უწყების ცნობით, მომხდართან დაკავშირებით საგარეო საქმეთა სამინისტროში რუსეთის ელჩი მიიწვიეს და საპროტესტო ნოტა გადასცეს. ოფიციალური მოსკოვის განცხადებით, შემთხვევა უამინდობის გამო მოხდა, "შემთხვევით" მოხდა.

ანალოგიური ინციდენტი დაფიქსირადა გუშინაც. ინციდენტის გამო, ოფიციალურმა ანკარამ რუსეთიდან ელჩი კიდევ ერთხელ გამოიწვია.

ინციდენტს შეერთებული შტატების სახელმწიფო მდივანი გამოეხმაურა. მისი თქმით, აღნიშნული ფაქტით ვაშინგტონი შეშფოთებულია და ეს ინციდენტი შეიძლებოდა სამხედრო თვითმფრინავის ჩამოგდებითაც დასრულებულიყო.

ნატომ კი გავრცელებულ განცხადებაში რუსეთის ქმედებას "სახიფათო და უპასუხისმგებლო" უწოდა.

ნატოს გენერალური მდივნის, იენს სტოლტენბერგის განცხადებით, რუსული სამხედრო თვითმფრინავების თურქეთის საჰაერო სივრცეში შეჭრა "შემთხვევითობას არ ჰგავს" და ამის შესახებ ალიანსს არანაირი რეალური ახსნა-განმარტება არ მიუღია.