"თუკი პუტინი გვიბრძანებს, სირიაში საკუთარ ხალხს ხვალვე გავგზავნით"

"თუკი პუტინი გვიბრძანებს, სირიაში საკუთარ ხალხს ხვალვე გავგზავნით" - რამზან კადიროვი

მსოფლიო - 17:27, 30 Sep, 2015

3592

ჩეჩნეთის პრეზიდენტის, რამზან კადიროვის განცხადებით, ის მზად არის სირიაში „ისლამურ სახელმწიფოსთან“ საბრძოლველად საკუთარი ხალხი „მსოფლიო დონის სპეციალისტები“ გაგზავნოს.

„იმ შემთხვევაში, თუკი რუსეთის ფედერაციის შეიარაღებული ძალების უმაღლესი მთავარსარდალი, ვლადიმერ პუტინი ბრძანებას გასცემს, მზად ვართ სირიაში ხვალვე გავგზავნოთ მსოფლიო დონის სპეციალისტები, რომელთა მსგავსი დასავლეთშიც კი არ ჰყავთ. ჩვენ გვაქვს გამოცდილება და ცოდნა. ჩვენ ვერ დაველოდებით როდის მოვლენ ისინი (ISIS) ჩვენს ქალაქებსა და სოფლებში “ - წერს კადიროვი „ინსატგრამის“ საკუთარ გვერდზე.

შეგახსენებთ, რამდენიმე წუთის წინ გავრცელებული ინფორმაციის თანახმად, რუსეთმა სირიაში პირველი ავიაიერიში განახორციელა.

გავრცელებული ცნობით, ავიადარტყმა ქალაქ ჰომში განხორციელდა, რომელიც მთავრობის ჯარების კონტროლქვეშ იმყოფება, თუმცა ამავე რეგიონში „ისლამური სახელმწიფო“ და ოპოზიციური ძალების შეიარაღებული ფორმირებები მოქმედებენ.

დილით, სირიის მთავრობის ადმინისტრაციამ მოსკოვისგან დამასკოში სამხედრო ავიაციის გაგზავნა დაადასტურა.

„სირიის პრეზიდენტის, ბაშარ ასადის მიერ რუსეთის პრეზიდენტისადმი გაგზავნილი წერილის საპასუხოდ, რომელიც რუსეთისგან სამხედრო დახმარებას თხოვნას გულისხმობს, მოსკოვმა დამასკოში სამხედრო-საჰაერო ძალები გაგზავნა. რაც ტერორიზმის წინააღმდეგ ბრძოლაში გამოიყენება“ - ნათქვამია განცხადებაში.

რამდენიმე საათის წინ გავრცელებული ინფორმაციის თანახმად კი, რუსეთის ფედერაციის საბჭომ ვლადიმერ პუტინს უფლება მისცა, რუსეთის შეიარაღებული ძალები ქვეყნის ფარგლებს გარეთ, მათ შორის სირიაში გამოიყენოს. როგორც გამოცემა "რია ნოვოსტი" იტყობინება, რუსმა სენატორებმა აღნიშნულ გადაწყვეტილებას მხარი ერთხმად დაუჭირეს.

რუსეთის პრეზიდენტის ადმინისტრაციის უფროსის სერგეი ივანოვის განცხადებით, ინიციატივამ სრული 162 ხმა მიიღო. მისივე თქმით, რუსეთი სირიაში სახმელეთო ოპერაციას არ ჩაატარებს. იგეგმება მხოლოდ სამხედრო-საჰაერო ძალების გამოყენება.
2014 წლის მარტში რუსეთის ფედერაციის საბჭომ პუტინს უფლება მისცა, რუსული ჯარი უკრაინაში გამოიყენო