მიხელ სააკაშვილმა CNN-ის ეთერში პუტინისა და ობამას შეხვედრაზე ისაუბრა

მსოფლიო - 13:33, 30 Sep, 2015

4993

ოდესის ოლქის გუბერნატორმა და საქართველოს მესამე პრეზიდენტმა, მიხეილ სააკაშვილმა ტელეკომპანია CNN-ის ეთერში აშშ-ისა და რუსეთის პრეზიდენტების შეხვედრის შესახებ შეფასებები გააკეთა.

ინტერვიუში, რომელიც ორი ქვეყნის ლიდერების შეხვედრამდე ჩაიწერა სააკაშვილი ამბობს, რომ ვლადიმერ პუტინმა აშშ-სთან შეხვედრის შანსი პრობლემების შექმნის გზით მოიპოვა, რაც სირიაში პრეზიდენტ ბაშარ ასადის რეჟიმის მხარდაჭერაში გამოიხატება.

გარდა ამისა, სააკაშვილმა აღნიშნა, რომ პუტინის მიზანს უკრაინის მოვლენებიდან, მსოფლიოს ყურადღების სხვა თემაზე გადატანა წარმოადგენს.

„პრეზიდენტმა ობამამ ისაუბრა უკრაინის ტერიტორიის შესახებ, რომელიც რუსეთის მიერაა ოკუპირებული. მან ახსენა ყირიმიც. სამწუხაროდ, არ გაჟღერებულა საქართველოს ტერიტორიების საკითხი, როემლიც ასევე რუსეთის მიერააა ოკუპირებული. თუმცა, ამას ხშირად ახსენებენ შეერთებული შტატების სხვა ოფიციალური პირები. ეს ყველაფერი კი თავისთავად ნიშნავს პრეზიდენტის მხრიდან მნიშვნელოვან გზავნილს. პუტინს არ გამოუვა, რომ ეს შეხვედრა დიპლომატიური იზოლაციის დასასრულად და მის გამარჯვებად გაასაღოს“ - განაცხადა მიხეილ სააკაშვილმა.

მისი თქმით, ყირიმის ანექსიის გამო, აშშ-ის მირ რუსული კომპანიებისა და ფიზიკური პირებისთვის დაწესებული სანქციები, უკრაინისთვის ძალიან სასარგებლოა და მიუხედავად იმისა, რომ რუსეთი უკრაინის დემოკრატიულობის აღმოფხვრას, თავისუფლების შეზღუდვას ცდილობს, საერთაშორისო საზოგადოება ამას არ დაუშებს.

სააკაშვილმა რუსეთის სამხედრო შესაძლებლობებზე ისაუბრა და აღნიშნა, რომ სირიაში საბრძოლო მოქმედებების ჩართვა, რეგიონში ვითარების დესტაბილიზაციას გამოიწვევს.