საქართველოს მცირე და საშუალო საწარმოთა ასოციაცია პარლამენტის ინიცირებულ პროექტს ეხმაურება

საზოგადოება - 10:58, 11 Mar, 2013

278

ასოციაციას მიაჩნია, რომ კანონის წინაშე თანასწორობა ყველაზე მთავარი ღირებულება უნდა იყოს საზოგადოებისთვის. სწორედ შერჩევითი სამართალი იყო მოქალაქეთა უკმაყოფილების ყველაზე დიდი საფუძველი. ადვილად შესამჩნევი იყო ის პრეფერენციები, რომლებითაც ძალიან ვიწრო წრეები სარგებლობდნენ, ხოლო სხვა მეწარმეები ხელოვნური სქემებით კოტრდებოდნენ და თმობდნენ ქონებას. უმკაცრესი საგადასახადო ადმინისტრირების ფონზე მცირე და საშუალო მეწარმეები ახორციელებდნენ სრულ დეკლარირებას, ცდილობდნენ რა რომ შეცდომები არ დაეშვათ, იმაზე მეტ ვალდებულებებს იღებდნენ, ვიდრე ეკისრებოდათ. უმეტეს მათგანს გადახდილი აქვს გადასახადები და ფიქრობს მომავალ განვითარებაზე.
დღეს, როდესაც საუბარი მიმდინარეობს არადეკლარირებული გადამხდელების ამნისტირებაზე, ეს ისევ იმ შერჩევითი სამართლის გაგრძელება იქნება, რაც ბოლო რვა წლის განმავლობაში ხორციელდებოდა. მართალია საგადასახადო ამნისტიის ზოგადი განხილვა ლეგიტიმურია, მაგრამ ის არ უნდა იყოს პოლიტიკური ხელისუფლების ცვლილების პროცესის ნაწილი და ერთი მხარის დაინტერესება.
მივმართავთ საქართველოს პრეზიდენტს, ამნისტიის განხორციელების შემთხვევაში:
• რას ეუბნებით იმ მეწარმეებს, რომლებმაც პირნათლად და უფრო მეტად შეასრულეს საგადასახადო ვალდებულებები სახელმწიფოს წინაშე?
• რას ვეუბნებით იმ 92 000 მოქალაქეს, რომლებმაც წარმოუდგენელი „ჰუმანურობა“ გამოიჩინეს და თქვენი პრეზიდენტობის პერიოდში ქონება საჩუქრად გადასცეს სახელმწიფოს?
აღარ ვკითხულობთ სხვა სახის ფინანსურ ტრანზაქციებსა და გარიგებებს.

ჩვენს ასოციაციას მიაჩნია რომ ამნისტია უნდა განხორციელდეს სალარო აპარატების წესების დარღვევაზე დაჯარიმებული მეწარმეების მიმართ.

საქართველოს მცირე და საშუალო საწარმოთა ასოციაციის მისიაა ბიზნეს-საზოგადოების საერთო ინტერესების ადვოკატირება, საქართველოში გარემოს გაუმჯობესების, კერძო სექტორის კონკურენტუნარიანობისა და პროდუქტიულობის გაზრდის მიზნით.