თურქეთში თავისუფალ მედიაზე შეტევა და ჟურნალისტების დაკავება გრძელდება. გაზეთ „ბუგუნ“-ის ჟურნალისტი და მწერალი გულთექინ ავჯი, მის მიერ გამოქვეყნებული 7 საგაზეთო სტატიის გამო, „გადატრიალების მოწყობის“, „ტერორისტული ორგანიზაციის ჩამოყალიბებასა და მისი მართვის“ და „ჯაშუშობის“ ბრალდებით დააკავეს. ავჯი, საკუთარ სტატიებში ერდოღანის ხელისუფლებასა და მის ქმედებებს აკრიტიკებდა. ჟურბალისტი ქალაქ იზმირში დააკავეს და სტამბოლში გადაიყვანეს, სადაც ჩვენების ჩამორთმევის გარეშე ბრალდების მხარემ პირდაპირ სასამართლოს გადასცა. სასამართლომ კი მისი დაკავების გადაწყვეტილება მიიღო.

გულთექინ ავჯის ადვოკატის, ფიქრეთ დურის განცხადებით, მისი დაცვის ქვეშ მყოფის წინააღმდეგ არსებული ბრალდებების დამამტკიცებელი საბუთი არ არსებობს.

„ავჯის დაპატიმრება თვალსაჩინო მაგალითი იმისა, თუ რა მდგომარეობაშია თურქეთის სასამართლო სისტემა. ქვეყანაში კანონმა ძალა დაკარგა“ - აღნიშნა ადვოკატმა.

შეგახსენებთ, გასულ კვირას ცნობილი ოპოზიციონერი ჟურნალისტების ჰასან ჯემალი და აჰმეთ ალთანის წინააღმდეგ გამოძიება დაიწყო. თვის დასაწყისში, პოლიციამ რეჯეპ ტაიპ ერდოღანის ყველაზე დიდი „მტერი“, თავისუფალი მედიის ერთ-ერთი ძლიერი მედია ჯგუფის, Koza Ipek Holding-ის სათაო ოფისი , ასევე ჟურნალი „ნოქთა“ დაარბია. რედაქციისა დარბევას წინ ერდოღანის „სელფით“ გამოქვეყნებული სტატია უძღვოდა. ჟურნალის უკანასკნელ ნომრის გარეკანზე, პრეზიდენტი ერდოღანია გამოსახული, რომელიც ქვეყანაში ბოლო დროს განვითარებულ მოვლენების შედეგად ტერორისტების მიერ დაცხრილული ჯარისკაცების დაკრძალვის ცერემონიაზე სელფის იღებს. ჩაფანის განცხადებით, ეს ფოტომონტაჟია, რომლის ინსპირაციის წყარო 2013 წელს ერაყის ომთან დაკავშირებით გავრცელებული ტონი ბლერის ფოტომონტაჟი გახდა. ამავდროულად, თურქეთის საგამოძიებო სამსახურმა ერთ-ერთი უმსხვილესი მედიაჰოლდინგ Dogan Media Holding-ის წინააღმდეგ გამოძიება დაიწყო. თურქული მედიის ცნობით, ჰოლდინგი ტერორიზმის პროპაგანდაშია ეჭვმიტანილი.