თბილისის საქალაქო სასამართლოს მოსამართლე ლაშა ჩხიკვაძემ გიგი უგულავას ადვოკატების შუამდგომლობა პროცესის გადადების თაობაზე არ დააკმაყოფილა.

დაცვის მხარე პროცესის ერთი კვირით გადადებას ითხოვდა, რათა უკეთესად მოემზადებინათ დასკვნითი სიტყვა, ადვოკატების მეორე არგუმენტი, ემოციური ფონის ჩაცხრობა იყო.

"გუშინდელი სასამართლო გადაწყვეტილების შემდეგ, რომლის მიხედვითაც გიგი უგულავა გათავისუფლდა, "ქართული ოცნების" წარმომადგენელმა თამაზ მეჭიაურმა პოლიტიკური განცხადება გააკეთა და აღნიშნა, რომ რამდენიმესაათიანი ზეიმი, ზეიმად დარჩება თუკი გიგი უგულავას მიმართ გამამტყუნებელი განაჩენი გამოვა. უნდა ჩაცხრეს ემოციური ფონი და ამის შემდეგ უნდა გაგრძელდეს პროცესი",- აღნიშნა ბექა ბასილიამ სასართლოს სხდომაზე.

საბოლოო ჯამში მოსამართლემ უსაფუძვლოდ მიიჩნია დაცვის მოთხოვნა გადადების თაობაზე, შესაბამისად, უგულავას ადვოკატებს დღეს მოუწევთ სასამართლოს წინაშე წასრდგენა დასკვნითი სიტყვით, რის შემდეგაც სასამართლომ გიგი უგულავას განაჩენი უნდა გამოიტანოს რიყის გასხვისების საქმეზე.