”უგულავას გათავისუფლებაზე საერთო სასამართლოს გადაწყვეტილება დაუყოვნებლივ აღსრულდებოდა”

სამართალი - 22:29, 17 Sep, 2015

2722

სასჯელაღსრულებისა და პრობაციის მინისტრის კახა კახიშვილის თქმით, იმ შემთხვევაში თუ გუშინ ბრალდებულ გიგი უგულავას გათავისუფლების შესახებ გადაწყვეტილებას საერთო სასამართლო გამოიტანდა , ის მე-9 დაწესებულების ხელმძღვანელის მხრიდან დაუყოვნებლივ აღსრულდებოდა.
ამასთან, როგორც კახიშვილმა „იმედის“ ეთერში განაცხადა, არასწორია მოსაზრება, თითქოს მან უგულავას გათავისუფლების პასუხისმგებლობა სასჯელაღსრულების კონკრეტული დაწესებულების ხელმძღვანელს დააკისრა. მინისტრი ამბობს, რომ მხოლოდ პროცედურები განმარტა.

„გუშინ, განზრახ თუ შეცდომით, ვიღაცის შეცდომაში შეყვანის ან საზოგადოებრივი აზრის ფორმირების გამო, სრულიად უსაფუძვლოდ მართავდნენ აქციებს მე-9 დაწესებულებასთან და სასჯელაღსრულებისა და პრობაციის სამინისტროსთან იმ მოთხოვნით, რომ თურმე მე უნდა გამეთავისუფლებინა გიგი უგულავა პატიმრობიდან საკონსტიტუციო სასამართლოს გადაწყვეტილების საფუძველზე. საკონსტიტუციო სასამართლო თავად არ მსჯელობს კონკრეტული ბრალდებულის გათავისუფლება-არგათავისუფლების თაობაზე. მე ავუხსენი ეს იმ პირებს, რომლებსაც აინტერესებდათ. ჯერ თავიდან საუბრობდნენ, რომ თურმე გადაწყვეტილებას ვერ გვაბარებდნენ. ამის გამო დავბრუნდი სამინისტროში, ჩავიბარე გადაწყვეტილება, იქ მქონდა შეხვედრა ადვოკატთან და ერთ-ერთ დეპუტატთან და მე ავხსენი, რომ ამ საკითხს ჩვენ შევისწავლით. მეორე - თავად დარწმუნდნენ და იცოდნენ კიდეც, რომ ეს გადაწყვეტილება არის კონკრეტული ნორმის არაკონსტიტუციურად ცნობის და არა რომელიმე ადამიანის საპატიმროდან გათავისუფლების თაობაზე. რომ ყოფილიყო საერთო სასამართლოს გადაწყვეტილება, რომ დაუყონებლივ გათავისუფლდეს ბრალდებული გიგი უგულავა მე-9 დაწესებულებიდან, დაუყოვნებლივ აღსრულდებოდა ეს გადაწყვეტილება დაწესებულების ხელმძღვანელის მხრიდან“, - აღნიშნა მან.