გიგი უგულავას ადვოკატი გიორგი გელხაურის განცხადებით დღევანდელი პროცესის დასაწყისშივე ჩანდა, რომ პროკურატურას გამიზნული ჰქონდა, ყველა გზა ეხმარა იმისთვის, რომ პროცესი გაეჭიანურებინა.

„დღევანდელი პროცესის დაწყებიდანვე უკვე ჩანდა, რომ პროკურატურას გამიზნული ჰქონდა, მაქსიმალურად ეღონა ყველაფერი, რომ პროცესი გაეჭიანურებინა. პირველი ის, რომ მათ პროცესზე დააგვიანეს, შემდეგ კი დააყენეს მოსამართლის აცილების საკითხი, რაზეც მოსამართლემ უარი უთხრა. შემდეგ დააყენეს მთლიანი სასამართლო კოლეგიის აცილების საკითხი, რაზეც ასევე უარი უთხრა სასამართლომ, შუამდგომლობის უსაფუძვლობის გამო. ჩვენს შუამდგომლობაზე, რომლითაც მოვითხოვეთ საკონსტიტუციო სასამართლოს გადაწყვეტილების საფუძველზე დაუყონებლივ მოხდეს უგულავას გათავისუფლება, პროკურატურამ მოითხოვა ვადა, იმიტომ, რომ მათ არ იცოდნენ აღნიშნული შუამდგომლობა, არ იცოდნენ საკონსტიტუციო სასამართლოს გადაწყვეტილება და მის გასაცნობად დრო ითხოვეს.

თქვენ გჯერათ იმის, რომ რომელიმე ადამიანი დღეს საქართველოში არ იცნობს საკონსტიტუციო სასამართლოს გადაწყვეტილებას? აქედან გამომდინარე, აღნიშნულ ქმედებას მხოლოდ და მხოლოდ ერთ შეფასებას ვაძლევ - მათ უნდოდათ ყველანაირი ღონის გამოყენება, იხმარეს ყველა ნიუანსი, რომ მომხდარიყო პროცესის გაჭიანურება და გადადება, რაც უკანონობაა“, - განაცხადა გელხაურმა.