თურქეთში ყველაზე დიდი ბიზნესასოციაციის

თურქეთში ყველაზე დიდი ბიზნესასოციაციის - TUSIAD-ის წევრი დააკავეს

მსოფლიო - 15:55, 17 Sep, 2015

1647

თურქეთში, ბოლო დროს, თავისუფალი მედიის დარბევისა და ჟურნალისტების დაკავების შემდეგ, ამჯერად, ქვეყნის უმსხვილეს კომპანიებზე დაიწყო ზეწოლა და ერთ-ერთი უმსხვილესი კომპანიის Boydak Holding-ის CEO და ქვეყნის ყველაზე დიდი ბიზნესასოციაციის (TUSIAD) წევრი მემდუჰ ბოიდაგი დააკავეს. კიდევ ერთი მსხვილი კომპანია Alarko Holding-ის მეპატრონე ისაკ ალათონი კი იმ ბიზნესმენებს შორის აღმოჩნდა, რომელთა მიმართაც ანკარის პროკურატურამ გამოძიება დაიწყო.

გუშინ Boydak Holding-ის ფირმები და კომპანიის მიერ გახსნილი საგანმანათლებლო დაწესებულებები დაარბიეს. სამართალდამცველებმა ქალაქ კაისერში, Boydak-ის ხელმძღვანელთან ერთად კიდევ 8 ბიზნესმენი დააკავეს. თურქულ პრესაში გამოქვეყნებულ მასალებში წერია, რომ ჯერ კიდევ თვეების წინ, პრეზიდენტმა ერდოღანმა Boydak Holding-ის ხელმძღვანელობას გვერდში დგომა შესთავაზა. კომპანიის ხელმძღვანელობამ მაშინ მას უარი უთხრა. სწორად ამის შემდეგ დაიწყო ჰოლდინგზე ზეწოლა, რასაც ერთერთი ხელმძღვანელის დაკავება მოჰყვა.

ქვეყანაში 14 ათასზე მეტი ადამიანის დამსაქმებელი კომპანიის, ერთერთი უმსხვილესი სამრეწველო გიგანტის Boydak Holding-ის მიმართ განხორციელებულ სპეცოპერაციასთან დაკავშირებით თურქეთის მრეწველთა და ბიზნესმენთა ასოციაციამ (TUSIAD) მწვავე კრიტიკული განცხადება გამოაქვეყნა. განცხადებაში, ბიზნეს სექტორის შეთითხნილი ბრალდებებით შეწუხებას გაესვა ხაზი.

„სპეცოპერაციის დროს, TUSIAD-ის ერთერთი ბიზნესმენი მემდუჰ ბოიდაქი დააკავეს, რომელიც ამავე დროს, TUSIAD-ის დირექტორთა საბჭოს წევრია. მოვითხოვთ მის სასწრაფოდ გათავისუფლებას“, - ნათქვამია განცხადებაში, სადაც ასევე აღნიშნულია, რომ კანონის წინაშე ყველა თანაბარია, - „კანონით მართვად სახელმწიფოებში ბიზნესის სექტორის ჩათვლით არცერთი კომპანია და ფიზიკური პირი შემოწმებისა და გამოძიებისგან თავისუფალი არ არის და კანონის წინაშე ყველა პასუხს აგებს".

როგორც განცხადებაშია აღნიშნული, მემდუჰ ბოიდაქი ბიზნესსექტორში რეპუტაციის მქონე, პატივსაცემი და ღირსეული წევრია. ბიზნესმენების მიმართ წაყენებული უსაფუძვლო ბრალდებები ბიზნესმენებში აღშფოთებას იწვევს, - „ეს ბნელი ატმოსფერო რაც შეიძლება მალე უნდა დასრულდეს“.

TUSIAD-ის წევრი კომპანიები თურქეთის საგარეო ვაჭრობის 80 პროცენტს ასრულებენ. ამასთან, საჯარო სამსახურში დასაქმებული ადამიანების გარდა მომუშავე ადამიანების ნახევარს სამუშაოთი უზრუნველყოფენ.