პროკურორ გიგა ძნელაძის თქმით, უგულავას აღკვეთის ღონისძიების გადახედვაზე იმ საქმის მოსამართლემ უნდა იმსჯელოს, რომელმაც მას პატიმრობა შეუფარდა.

მისი თქმით, საქალაქო სასამართლოში მიმდინარე პროცესს, რომელიც „ტელეიმედის“ და რიყის გასხვისებას ეხება, საკონსტიტუციო სასამართლოს გადაწყვეტილებასთან შემხებლობა არ აქვს.

„საკონსტიტუციო სასამართლოს გადაწყვეტილება წარმოადგენს საფუძველს, რომ სასამართლომ გადახედოს ბრალდებულის მიმართ პატიმრობის სახით გამოყენებულ აღკვეთის ღონისძიების საკითხს. ამ საკითხზე უნდა იმსჯელოს იმ საქმის მოსამართლემ, რომელ საქმეზეც გიგი უგულავას შეფარდებული აქვს პატიმრობა", - განაცხადა ძნელაძემ, რომელიც "ტელეიმედისა" და რიყის ტერიტორიის გასხვისების საქმის პროკურორია.

შეგახსენებთ, თბილისის ყოფილ მერს წინასწარი პატიმრობა გასული წლის 4 ივლისს შეეფარდა. საქმე ეხება უკანონო თანხების ლეგალიზების საქმეს. ასევე უგულავა ბრალდებულად სცნეს მარნეულის ეპიზოდთან დაკავშირებით.