ვიდეოპაემნის გადასახადი უქმდება - სასჯელაღსრულების მინისტრი

სამართალი - 15:03, 16 Sep, 2015

2084

სასჯელაღსრულების და პრობაციის მინისტრი კახი კახიშვილი პრობაციის სისტემაში დაწესებული რამდენიმე გადასახადის გაუქმების შესახებ ინფორმაციას ავრცელებს. კახიშვილის განცხადებით, ერთ-ერთი გადასახადი, რომელიც პენიტენციალრ სისტემაში გაუქმდება ვიდეოპაემნის გადასახედი იქნება.

კახიშვილმა ჟურნალისტებთან შეხვედრისას ელექტრონული მონიტორინგის სისტემის დანერგვის ხარჯზე მომავალში პატიმრების რაოდენობის შემცირებაზეც ისაუბრა.

"საქართველოს მთავრობა ზუსტად იმ კუთხით მუშაობს, რომ ის პირი, რომელიც შეიძლება არ იჯდეს ციხეში, მიუხედავად იმისა, რომ შესაძლებელია ჩადენილი ჰქონდეს დანაშაული, არ უნდა იჯდეს ციხეში. ამისთვის საჭიროა ალტერნატიული კონტროლი ახალი ტექნოლოგიებით. ერთ-ერთი ტექნოლოგია ზუსტად ელექტრონული სამაჯურები იქნება, რომელსაც ჩვენ ვნერგავთ. ალბათ ოქტომბრის პირველ რიცხვებში გავხსნით მონიტორინგის ცენტრს. ამავდროულად მომავალი წლის მარტიდან იგეგმება სოციალური მუშაკის ჩართვა არასრულწლოვანთა სასამართლო პროცესებში რაც ხელს შეუწყობს ადეკვატურ მიდგომებს. ჩვენ უკვე მზად გვაქვს საკანონმდებლო ცვლილებათა პაკეტი, რომელსაც ჯერ მთავრობას და შემდგომში პარლამენტს წარვუდგენთ. კანონპროექტის მიხედვით უარს ვიტყვით ზოგიერთ იმ გადასახადზე, რომელიც დაწესებულია პრობაციის ეროვნულ სააგენტოში, მაგალითად, ვიდეოპაემანი, ერთი ოფისიდან მეორე ოფისში გადასვლა. ეს ყველაფერი დაკავშირებული იყო ხარჯებთან, ამიტომ ჩვენ ასეთი ტიპის გადასახადებზე უარის ვიტყვით", - განაცხადა კახი კახიშვილმა.

ამის შესახებ ჟურნალისტებს სასჯელაღსრულებისა და პრობაციის მინისტრმა კახი კახიშვილმა სასტუმრო "ქორთიარდ მარიოტში" განუცხადა, სადაც თემაზე "პრობაციის ეროვნული სააგენტო, როგორც ალტერნატიული სანქციებისა და ღონისძიებების აღმასრულებელი პროგრესული უწყება საქართველოში" სისხლის სამართლის რეფორმის უწყებათაშორისი საკოორდინაციო საბჭოს პრობაციის სისტემის რეფორმის სამუშაო ჯგუფის შეხვედრა მიმდინარეობს.