"2008 წლის ომი, კრემლიდან ვიღაც „ნაბიჭვრის“ სატელეფონო ზარით დაიწყო"

მსოფლიო - 14:30, 12 Sep, 2015

9134

"2008 წლის აგვისტოს ომი, კრემლიდან, ვიღაც „ნაბიჭვრის“ მიერ განხორციელებული სატელეფონო ზარით დაიწყო" - ამის შესახებ წარმოშობით ქართველმა, რუსეთში მოღვაწე ჟურნლისტმა და შოუმენმა, ოთარ კუშანაშვილმა „რადიო ამბების“ პირდაპირ ეთერში განაცხადა.

„აღმოსავლეთ უკრაინის ომი დაიწყო კრემლში და კრემლშივე უნდა დასრულდეს. ისევე როგორ, 2008 წლის აგვისტოს ომი დაიწყო, კრემლიდან, ვიღაც „ნაბიჭვრის“ მიერ განხორციელებული სატელეფონო ზარით. იმასაც კი ვხვდები, რა ჰქვია იმ „ნაბიჭვარს.“ რაც კრემლში დაიწყო, დღემდე გრძელდება. ეს საშინელება, თუმცა ფაქტია, რადგან ოსები და ქართველები ჯერაც ერიდებიან ერთმანეთს. გასაგებია, მათ ზღუდავთ გარკვეული სტანდარტები, მაგრამ ოსებს ქართველებთან მეგობრობა არ სურთ. ეს 2008 წლის სამი დღეა, მაგრამ ჩვენ ახლა თითქმის მუდმივი ომის შესახებ ვსაუბრობთ" - განაცხადა კუშანაშვილმა.

მისი თქმით, აღმოსავლეთ უკრაინაში შეიარაღებული კონფლიქტი კრემლის მიერ იყო ინსპირირებული, შედეგად კი რუსეთმა ყირიმის უკანონო, დანაშაულებრივი, მაგრამ დროებითი ანექსია მოახდინა.

„ეს ყველაფერი აუცილებლად დასრულდება და რუსი და უკრაინელი ხალხი „შერიგდება,“ თუმცა ამას დრო სჭირდება. ის სიძულვილი, რომელიც უშიშროების ყოფილმა პირებმა დათესეს, ხალხს ერთმანეთის დახმარების საშუალებას არ აძლევს. ეს გააკეთეს პოლიტიკოსებმა" - აღნიშნა ჟურნალისტმა.

უკრაინის მოვლენებთან დაკავშირებით, პუტინის მიმართ კრიტიკა კუშანაშვილს არაერთხელ გამოუთქვამს.