აშშ-ის პრეზიდენტმა, ბარაკ ობამამ სირიასთან მიმართებით რუსეთის პოლიტიკას შეცდომა უწოდა.

განცხადება შეერთებული შტატების პრეზიდენტმა ამერიკელ სამხედროებთან შეხვედრაზე მას შემდეგ გააკეთა, რაც ამერიკულ მედიაში გავრცელდა ინფორმაცია, რომ რუსეთმა სირიაში იარაღის მიწოდებასთან ერთად ცოცხალი ძალაც გაგზავნა.

"მათი სტრატეგია, რომელიც ბაშარ ასადის რეჟიმის მხარდაჭერას გულისხმობს, შეცდომაა" - განაცხადა ობამამ.

მისი თქმით, ასადის რეჟიმის მხარდაჭერით, მოსკოვი ხელს შეუშლის პრობლემის მოგვარებისთვის საჭირო პოლიტიკური გადაწყვეტილების პოვნას.