დაკავებულის ოჯახის წევრები პოლიციას ნარკოტიკის ჩადებაში ადანაშაულებენ

დაკავებულის ოჯახის წევრები პოლიციას ნარკოტიკის ჩადებაში ადანაშაულებენ - აქცია ქობულეთში

სამართალი - 12:10, 10 Sep, 2015

2209

ქობულეთში, პოლიციის განყოფილებასთან აქცია გაიმართა. შეკრებილებმა რომან კეკიაშვილის დაკავება გააპროტესტეს. დაკავებულის ოჯახის წევრები და ნათესავები აცხადებენ, რომ მას სამართალდამცავებმა ნარკოტიკული ნივთიერება ჩაუდეს.

რომან კიკეიშვილის დაკავებაში ოჯახის წევრები და ახლობლები შინაგან საქმეთა სამინისტროს ქობულეთის სამმართველოს უფროსის მოადგილეს ირაკლი შაქარაშვილს ადანაშაულებენ. მათი განცხადებით, დაკავებულს ჩაუტარდა ნარკოტესტი, მაგრამ მას არავითარი ნარკოტიკული ნივთიერება არ აღმოაჩნდა.

შსს-ს ინფორმაციით, აჭარის მთავარი სამმართველოს ქობულეთის რაიონულმა სამმართველომ ოპერატიული ინფორმაციის საფუძველზე დაიწყო გამოძიება წარსულში ნარკოტიკული საშუალების უკანონო მოხმარებისთვის ნასამართლევი, 1988 წელს დაბადებული რომან კ-ს მიმართ, რომელიც ამჟამად პირობითი მსჯავრის ქვეშ იმყოფება.

სამართალდამცველებმა რომან კ. მიმდინარე წლის 9 სექტემბერს, ქალაქ ქობულეთში, მემედ აბაშიძის ქუჩაზე, N26-ის მიმდებარე ტერიტორიაზე შეაჩერეს. პოლიციამ მისი პირადი ჩხრეკისას 2 აბი და ნატეხი, ასევე, ფხვიერი ნარკოტიკული საშუალება ამოიღეს, რომელიც ექსპერტიზის დასკვნით 0,024 გრამ ბუპრენორფინს შეიცავს.

გამოძიება ნარკოტიკული საშუალების უკანონო შეძენა-შენახვის ფაქტზე მიმდინარეობს (საქართველოს სსკ-ის 260-ე მუხლის 1-ლი ნაწილით).