მოლდოვის ხელისუფლებამ აფხაზეთის დე ფაქტო რესპუბლიკის ე.წ. ოფიციალური დელეგაცია რეისიდან მოხსნა.

ამის შესახებ ინფორმაციას ოკუპირებული აფხაზეთის ე.წ. საგარეო საქმეთა სამინისტრო ავრცელებს. განცხადების თანახმად, მოლდოვამ აფხაზი მაღალჩინოსნების დეპორტაცია მოახდინა და ქვეყანაში შესვლა 10 წლით აუკრძალა.

„აფხაზეთის საგარეო საქმეთა სამინისტრო მკაცრ პროტესტს გამოხატავს მოლდოვის მხარის მიმართ და მიიჩნევს, რომ აფხაზეთის რესპუბლიკის მაღალჩინოსნების მიმართ გამოხატული ქმედება, მიუღებელი და დისკრმინაციულია. საგარეო უწყება მიმართავს საერთაშრისო თანამეგობრობასა და მოლდოვა-დნესტრისპირეთის კონფლიქტის მედიატორებს, ობიექტურად შეაფასონ მომხდარი მოვლენა, რათა თავიდან ავიცილოთ მოლდოვის მხრიდან მორიგი პროვოკაციული ქმედებები“ - ნათქვამია განცხადებაში.

აფხაზეთის ე.წ. ოფიციალური დელეგაცია, რომელსაც ე.წ. ვიცე-პრეზიდენტი, ვიტალი გაბნი ხელძღვანელობდა, ტირასპოლში, (დნესტრიპირეთის თვითგამოცხადებული რესპუბლიკის დედაქალაქი), ღონისძიებას დაესწრო, რომელიც მოლდოვას დნესტრიპირეთის რესპუბლიკის ჩამოყალიბების 25 წლისთავს ეძღვნებოდა.

მოლდოვის ხელისუფლების განცხადებით, დელეგაციის ეს ქმედება მოლდოვის სუვერენიტეტსა და ტერიტორიულ მთლიანობას უთხრის ძირს.

"მოლდოვის ხელისუფლება, რომელიც საქართველოსთან მჭიდრო კავშირშია, საქართველოს იდენტური პოლიტიკის დემონსტრირებას ახდენს, რომელიც მიმართულია მათი მეზობელი სახელმწიფოებისა და მოქალაქეების იზოლაციასა და დისკრიმინაციაზე. მოლდოვური მხარის აღნიშნული პროვოკაციული ქმედებები ეეწინააღმდეგება თავისუფალი გადაადგილების საყოველთაო უფლებას " - ნათქვამია სოხუმის ოფიციალური ცნობაში.