"შპს "კაზინო აჭარა" ამჟამინდელი მფლობელის სახელით უსაფუძვლოს და უპასუხისმგებლოს უწოდებს დღეს მედიაში გავრცელებულ ბრალდებებს და ამ საკითხთან დაკავშირებით შემდგომ განცხადებას ავრცელებს:
2009 წლის 31 ოქტომბერს გაფორმდა ხელშეკრულება შპს "კაზინო აჭარის" 100% წილის ნასყიდობის შესახებ. ნასყიდობის ფასი შეადგენდა 12 მილიონ აშშ დოლარს. ხელშეკრულებით ნაკისრი ვალდებულებები სრულად იქნა შესრულებული მყიდველი მხარის მიერ. ხელშეკრულებით გამყდიველ მხარეს უშუალოდ წარმოადგენდა ფიზიკური პირი - თეიმურაზ უგულავა, რომლის 100%-იან საკუთრებაში სამეწარმეო რეესტრის თანახმად იმყოფებოდა გასაყიდი კომპანია.
ხელშეკრულების თანახმად, ნებისმიერი ვალდებულება, რომელიც კომპანიას - შპს "კაზინო აჭარას" აღმოაჩნდება და შეეხება გადაცემამდე არსებულ პერიოდს და ეს გარემოება არ იქნება ცნობილი მყიდველი მხარისათვის, გამყიდველი - იგივე თემურ უგულავა იღებს პასუხისმგებლობას აღნიშნული ვალდებულებების შესრულებაზე. მყიდველისთვის ხელშეკრულების გაფორმების და ასევე შემდგომ პერიოდში არ ყოფილა ცნობილი ბ-ნ ივანე ჩიღვინაძესთან არსებული რაიმე სახის სამართლებრივი ურთიერთობის შესახებ",-ნათქვამია განცხადებაში.