კიევში შეტაკებების შედეგად გარდაცვლილთა რიცხვი სამამდე გაიზარდა

მსოფლიო - 15:43, 01 Sep, 2015

1474

უკრაინის შინაგან საქმეთა მინისტრის მრჩევლის, ანტონ გერაშენკოს განცხადებით, გუშინდელი შეტაკებების შედეგად ეროვნული გვარდიის კიდევ ერთი ჯარისკაცი გარდაიცვალა და შესაბამისად მსხვერპლი სამამდე გაიზარდა. ამის შესახებ გერაშენკო „ფეისბუკის“ გვერდზე იტყობინება. მისი თქმით, 20 წლის ალექსანდრ კოსტინი საავადმყოფოში გარდაიცვალა. რამდენიმე საათის წინ, შს მინისტრმა ერთი ჯარისკაცის გარდაცვალების შესახებ განაცხადა. ამჟამინდელი მონაცემებით, სულ უკრაინის ეროვნული გვარდიის 3 წარმომადგენელი დაიღუპა.

შინაგან საქმეთა სამინისტროს მონაცემების თანახმად, დაშავებულია 141 ადამიანი, 131 პოლიციელი და ეროვნული გვარდიის წევრები. 10 მათგანის მდგომარეობა კრიტიკულია. ამასთანავე დაკავებული 18 აქტივისტიდან, 13 გათავისუფლებულია.

კიევში შეტაკება გუშინ მოხდა. დეცენტრალიზაციის შესახებ კანონპროექტზე მსჯელობისას, დემონსტრანტებმა რადას შენობაში შეჭრა სცადეს. ინციდენტის მიუხედავად, საკონსტიტუციო ცვლილება, რომელიც ქვეყნის ყველა რეგიონის ადგილობრივი თვითთმართველობების, მათ შორის დონეცკისა და ლუგანსკის ოლქების უფლებასმოსილების გაზრდას გულისხმობს, რადამ დაამტკიცა.

აქციის მონაწილეეები მთავრობას დონბასში სეპარატისტებისთვის ლეგიტიმაციის მიცემაში ადანაშაულებენ.