,,ლევან გვაზავას ოჯახი გამოძიებას ენდობა და ჩვენ ველოდებით ექსპერტიზის პასუხებს“

,,ლევან გვაზავას ოჯახი გამოძიებას ენდობა და ჩვენ ველოდებით ექსპერტიზის პასუხებს“ - ადვოკატი

სამართალი - 13:40, 30 Aug, 2015

2145

ლევან გვაზავას ადვოკატი დარეჯან გილიგაშვილი აცხადებს, რომ გამოძიებას ოჯახის ენდობა და ამ ეტაპზე ისინი ექსპერტიზის პასუხებს ელოდებიან. ამის შესახებ ადვოკატმა ,,ნიუპოსტს“ განუცხადა.

,,ჩვენ ვფიქრობთ, რომ პროკურატურას ალბათ ჰქონდა საფუძველი, რომ ასეთი განცხადება გაევრცელებინა. ოჯახს ამ ეტაპზე არ აქვს საფუძველი, რომ გამოძიებას უნდობლობა გამოუცხადოს. ჩვენ ვენდობით გამოძიებას. დანიშნულია სხვადასხვა სახის ექსპერტიზა და ველოდებით მის პასუხებს, რომელიც ალბათ ძალიან ბევრ კითხვას გასცემს პასუხებს“.

არსებობს თუ არა ვარაუდი იმისა, რომ მომხდარის შესახებ სხვა ვერსიაც გამოიკვეთოს, ადვოკატი ამბობს, რომ ოჯახისთვის ფაქტიური გარემოებები უცნობია ,,ოჯახმა არ იცის რა მოხდა, ამდენად, ყოველთვის შეიძლება ეჭვი არსებობდეს, თუმცა ჩვენ ვერც დავადასტურებთ და ვერც უარვყოფთ გამოძიების ვერსიას. გამოძიება მუშაობს კეთილსინდისიერად და არ შეგვიძლია, რომ ეჭვი გამოვთქვათ მათ მუშაობასთან დაკავშირებით“ - განაცხადა ადვოკატმა ,,ნიუპოსტთან".

თბილისის მთავარ სამმართველოში გამოძიება სისხლის სამართლის საქმეზე, განზრახ მკვლელობის და ცეცხლსასროლი იარაღის უკანონოდ შეძენა შენახვის ფაქტზე დაიწყო, საქართველოს სისხლის სამართლის კოდექსის 108-ე და 236-ე მუხლის მეორე და მესამე ნაწილით გათვალისწინებული დანაშაულის ნიშნებით. მოგვიანებით საქმე შემდგომი გამოძიებისათვის გადაიგზავნა ქ. თბილისის პროკურატრის საგამოძიებო ნაწილში.

პროკურატურის განცხადებით, გასროლა სავარაუდოდ ლევან გვაზავას იარაღიდან მოხდა, აღნიშნულის შემდეგ ლევან გვაზავამ სავარაუდოდ მის ხელთ არსებული ცეცხლსასროლი იარაღით მიიყენა თვითდაზიანება თავის არეში, რის შემდგომაც იგი გადაყვანილ იქნა შპს ,,მაღალი სამედიცინო ტექნოლოგიების ცენტრი - საუნივერსიტეტო კლინიკა“-ში.

,,გამოძიების მოცემულ ეტაპზე მოპოვებული მასალებით გამოირიცხა ლევან გვაზავაზე და რევაზ კალომლეწავზე თავდასხმის განხორციელების ვერსია.
ამ ეტაპზე მიმდინარეობს სხვადასხვა საგამოძიებო მოქმედება, დანიშნულია სასამართლო-სამედიცინო, დაქტილოსკოპიური, ბიოლოგიური, ბალისტიკური, ტრასოლოგიური და ქიმიური ექსპერტიზები, რომელთა შედეგების მიხედვით საჭიროების შემთხვევაში დაზუსტდება კვალიფიკაცია და მიღებული იქნება შესაბამისი გადაწყვეტილება, რის თაობაზეც ეცნობება საზოგადოებას“ - ნათქვამია პროკურატურის განცხადებაში.

ამ დროისთვის ლევან გვაზავას მდგომარეობა სტაბილურად მძიმეა. ის რეანიმაციულ განყოფილებაში მართვის სუნთქვაზე იმყოფება.