ღვთისმშობლის კალთა იცავს საქართველოს ხილული და უხილავი მტრებისგან

ღვთისმშობლის კალთა იცავს საქართველოს ხილული და უხილავი მტრებისგან - ილია II

რელიგია - 15:03, 28 Aug, 2015

3385

სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ სიონის ღვთისმშობლის მიძინების სახელობის ტაძარში მარიამობის დღესასწაულთან დაკავშირებით გამართული წირვის შემდეგ მრევლს მარიამობის დღესასწაული მიულოცა და ღვთისმშობლის წყალობა და კურთხევა უსურვა.

როგორც პატრიარქმა ქადაგებისას განაცხადა, საქართველო ბედნიერია, რომ ღვთისმშობელმა გადააფარა თავისი კალთა.

„ყველას გილოცავთ, თქვენ და სრულიად საქართველოს ამ დიდებულ დღესასწაულს, მიძინებას ყოვლადწმინდისა ღვთისმშობლისა. ყოვლადწმინდა ღვთისმშობელი არის მფარველი მთელი მსოფლიოსი - ცისა და ქვეყანისა, მაგრამ საქართველო განსაკუთრებული წილხვედრია ყოვლადწმინდისა ღვთისმშობლისა. სულ რომ არაფერი არ ყოფილიყო და მარტო ეს ფაქტი ყოფილიყო - რომ საქართველო ღვთისმშობლის წილხვედრია, ეს საკმარისი იქნებოდა საქართველოს გაბრწყინებისათვის. საქართველო ბედნიერია, რომ ღვთისმშობელმა გადააფარა თავისი კალთა. გადააფარა და იცავს ხილული და უხილავი მტრებისაგან“, - განაცხადა პატრიარქმა. მისი თქმით ყველა მორწმუნემ უნდა შესთხოვოს მაცხოვარს და ღვთისმშობელს წყალობა და კურთხევა უნდა შესთხოვოს.

„მოციქულებს ასეთი წესი ქონდათ, როდესაც სადილზე ან სერობაზე შეიკრიბებდნენ, ორ ადგილს ტოვებდნენ თავისუფალს - ერთი მაცხოვარს და ერთი ღვთისმშობელ დედას და დარწმუნებულები იყვნენ, რომ უხილავად ესწრებოდნენ მათ. ჩვენც შევთხოვთ უფალს, რომ განუყოფელი იყოს მათი მადლი და წყალობა ჩვენზე. მადლი წყალობა და კურთხევა ღვთისმშობლისა მარად ყოფილიყოს ჩვენზე“, - აღნიშნა პატრიარქმა.