სოსო რობაქიძე გამოძიებას იური ვაზაგაშვილის მიერ დასახელებული 65 კაცით დაინტერესებას სთხოვს

სამართალი - 15:04, 27 Aug, 2015

1127

დღეს, საქალაქო სასამართლოში იური ვაზაგაშვილის საქმეზე სასამართლო პროცესი გაიმართა. პროცესზე ბრალდების მხარის 10 მოწმე დაიკითხა, მათ შორის იყვნენ სოსო რობაქიძე და ლაშა ჩხარტიშვილი. სოსო რობაქიძემ იური ვაზაგაშვილის გარდაცვალების მიზეზებზე ისაურა და აღნიშნა, რომ იგი აქტიურ საზოგადოებრივ საქმიანობას შეეწირა და გამოძიებას იმ 65 კაციანი სიით დაინტერესებისკენ მოუწოდა, რომელზეც იური ვაზაგაშვილი სიკვდილამდე საუბრობდა.

დაცვის მხარის ადვოკატმა სოსო ჯოგლიძემ განაცხადა, რომ სოსანაშვილის მომხდართან არავითარი კავშირი არ გააჩნია.

„მოტივი, რითაც ედავებიან ჩემი დაცვის ქვეშ მყოფს, რომ მან აღნიშნული დანაშაული ჩაიდინა იმ მოტივით, რომ მისთვის საპატივცემულო პიროვნებები შეიძლება აღმოჩენილიყვნენ ბრალდებულის სკამზე, არის აბსურდული“, - განაცხადა ჯოგლიძემ.

საქმის პროკურორი ლეან ბიჩინაშვილი მიიჩნევს, რომ დღეს, მოწმეების ჩვენებით კიდევ უფრო მეტად გამყარდა გია სოსანაშვილის ბრალეულობა.

„დღეს დაიკითხენ მოწმეები, მათ შორის სოსო რობაქიძე და ლაშა ჩხარტიშვილი, რომლებმაც ისაუბრეს იური ვაზაგაშვილის მოღვაწეობაზე, ასევე, იმ ვერსიაზე, რომ მისი მკვლელობა დაკავშირებულია საზოგადოებრივ საქმიანობასთან.
ჩვენებების შემდეგ იკვეთება ბრალდებულ გია სოსანაშვილის ბრალეულობა იური ვაზაგაშვილის განზრახ მკვლელობის ფაქტზე“, - განაცხადა პროკურორმა.

იური ვაზაგაშვილის მკვლელობის საქმეზე სასამართლო პროცესი 16 სექტემბერს გაგრძელდება.