,,მოამბის" ჟურნალისტთა ნაწილი არხზე ჩაურევლობის თხოვნით მიმართავენ პოლიტიკოსებს და ამასთან, თავშეკავებისკენ მოუწოდებენ იმ ადამიანებს, რომლებიც ხელისულფებას ღიად მოუწოდებენ არხზე სიტუაციის ,,დალაგებისკენ".

,,ნიუპოსტი" გთავაზობთ ,,მოამბის" ჟურნალისტების მიერ გავრცელებულ მიმართვას:

ჩვენ, როგორც ,,მოამბის" ჟურნალისტებს თხოვნა გვაქვს პოლიტიკოსებთან, გასაგებია მაღალი ინტერესი საზოგადოებრივი მაუწყებლის მიმართ, ისიც გვესმის, რომ შესაძლოა, ყველას გულწრფელად სურდეს, ეს არხი უკეთესი იყოს, - ეს ჩვენც გვინდა, თან გულწრფელად! ახლა, როცა ყველა ცდილობს, მომხდარს და ჯერ არ დასრულებულ პროცესს განსხვავებული ინტერპრეტაცია და შეფასება მისცეს, ვფიქრობ, რომ საუკეთესო გზა ჩაურევლობა იქნება. განსაკუთრებით პოლიტიკოსების ჩარევას ვგულისხმობთ. ნებისმიერი პოლიტიკური ძალის ნებისმიერი სახის ღია, ან ირიბი პოზიცია, შესაძლოა, აღქმული იყოს ჩარევად.

ჩვენ, როგორც "მოამბის" ჟურნალისტებს გვინდა, რომ საზოგადოებამ საინფორმაციო გამოშვების ეთერიდან მოისმინოს ობიექტური ინფორმაცია. გვინდა, სიუჟეტის მომზადების პროცესში არ ჩაერიოს რომელიმე პოლიტიკური მხარე, ან თუნდაც რომელიმე პოლიტიკურად მიკერძოებული რესპოდენტი.

ასევე ვთხოვთ თავშეკავებას იმ ადამიანებს, ვინც ღიად მოუწოდებს ხელისუფლებას არხზე სიტუაციის "დალაგებისკენ". ჩვენ მზად ვარ, პასუხისმგებლობა ავიღოთ საზოგადოების წინაშე "მოამბეში" გასულ ყველა ჩვენს მიერ მომზადებულ სიუჟეტზე და ბალანსზე ამ სიუჟეტებში", - ნათქვამია ელისო ჯარიაშვილი, ქეთევან ბოჯგუას, ქეთევან ქარდავას და მარიამ ცარელაშვილის მიერ გავრცელებულ განცხადებაში.