ეკიზაშვილის კომენტარი სხვა მედიასაშუალებებთან ერთად "ნიუპოსტმაც" გაავრცელა, თუმცა, გადამოწმების შემდეგ აღმოჩნდა, რომ "სუხიშვილების" კონცერტი 3 აპრილს სანკტ-პეტერბურგშია დაგეგმილი და ბილეთებიც იყიდება.

ამასთან, ბილეთების დაჯავშნა კონცერტზე სატელეფონო ზარითაც შესაძლებელია: "ნიუპოსტმა" ერთ-ერთ რუსულ პორტალზე მითითებულ სერვისზე დარეკა(0078123808050-ზარი განხორციელდა ფიქსირებული ტელეფონიდან), სადაც მას დაუდასტურეს, რომ "ოკტიაბრსკის" დიდ საკონცერტო დარბაზში "სუხიშვილების" კონცერტზე ბილეთები ნამდვილად იყიდება და დაგეგმილი კონცერტი არ გადადებულა. ამავე დროს, სოციალურ ქსელებში გავრცელდა პლაკატი, რომელზეც ცხადად ჩანს "სუხიშვილების" კონცერტის ანონსი. პლაკატის მიხედვით, კონცერტი რუსეთში საქართველოს კულტურისა და ხელოვნების ფონდის მხარდაჭერით ტარდება.

პორტალზე, სადაც გავრცელებული იყო ინფორმაცია "სუხიშვილების" კონცერტის შესახებ, აღნიშნულია, რომ "სანკტ-პეტერბურგი პირველი ქალაქია რუსეთში, რომელიც 2005 წლის შემდეგ პირველად უმასპინძლებს ქართული ბალეტის სახელმწიფო ანსამბლს. სანკტ-პეტერბურგი ამაყობს შესაძლებლობით, შეხვდეს ქართველებს რუსეთ-საქართველოს თხუთმეტწლიანი, არცთუ მეზობლური ურთიერთობის შემდეგ".

კულტურის სამინისტროს პრესსამსახურში "ნიუპოსტს" უთხრეს, რომ ერთდღიანი კონცერტი სანკტ-პეტერბურგში "სუხიშვილების" მხრიდან დაგეგმილია, თუმცა, ხაზი გაუსვეს, რომ ამ კონცერტთან საქართველოს კულტურის სამინისტროს შეხება არა აქვს.

ამ ინფორმაციის შეტყობის შემდეგ "ნიუპოსტმა" ხელახლა სცადა დაკავშირება "სუხიშვილებთან", თუმცა კონტაქტზე გასვლა ვერ მოახერხა.