შეხვედრა პუტინის გარეშე - გერმანიის, საფრანგეთის და უკრაინის ლიდერები ბერლინში შეიკრიბებიან

მსოფლიო - 15:03, 22 Aug, 2015

1725

24 აგვისტოს, ბერლინში გაიმართება გერმანიის, საფრანგეთისა და უკრაინის ლიდერების შეხვედრა, რომელშიც რუსეთის პრეზიდენტი ვლადიმერ პუტინი არ მიიღებს მონაწილეობას. განსახილველი საკითხი - აღმოსავლეთ უკრაინაში შექმნილი მდგომარეობაა. შეხვედრა პეტრო პოროშენკოს ინიციატივით გაიმართება.
აღნიშნული სამი ქვეყანა, რუსეთთან ერთად, წარმოადგენს ე.წ. "ნორმანდიულ ოთხეულს", რომლის ფორმ,ატიც აღმოსავლეთ უკრაინის მოვლენების მშვიდობიანი მოგვარებაა. შესაბამისად ეს პირველი შეხვედრაა, სადაც რუსეთის პრეზიდენტი არაა მიწვეული.

შეხვედრა განსაკუთრებით დიდ მნიშვნელობას იძენს იმ ფაქტის გამო, რომ იგი უკრაინის დამოუკიდებლობის დღეს ეძღვნება - შესაბამისად პოროშენკო საკუთარი ქვეყნის დამოუკიდებლობის დღეს არ იქნება სამშობლოში, არამედ მისი ქვეყნისთვის საკმაოდ მნიშვნელოვანი საკითხის შესახებ მოლაპარაკებებში მიიღებს მონაწილეობას.

ექსპერტები ანალიზს უკეთებენ ამ მოვლენას და მას რუსეთისთვის "სილის გაწვნას" უწოდებენ. როგორც ცნობილია ორივე ევროპელი ლიდერი, ისევე როგორც მსოფლიოს თითქმის ყველა ქვეყანა სწორედ რუსეთს სდებს ბრალს კონფლიქტის ესკალაციასა და სეპარატისტების სამხედრო და ეკონომიკურ მხარდაჭერაში.

თუმცა, არსებობს უკვე რუსეთის საგარეო უწყების განცხადება: "ეს არ არის "ნორმანდიული ოთხეულის" შეხვედრა არამედ სამმხრივი მოლაპარაკება გერმანიას, საფრანგეთსა და უკრაინას შორის, ჩვენ დავაკვირდებით ამ შეხვედრას და მის შედეგებს". ასევე, სამივე ქვეყნის დიპლომატებიც აცხადებენ, რომ არავინ უშლის პუტინს შეუერთდეს ამ შეხვედრას, თუმცა მას შემდეგ, რაც სამეული წინასწარ მოლაპარაკებებს დაასრულებს.

პოლიტოლოგები ასევე ამბობენ, რომ პუტინის ხასიათიდან გამომდინარე, ის არ აპატიებს ევროპელ ლიდერებს და შესაძლოა "ნორმანდიული ოთხეული" სამეულად გადაიქცეს - რუსეთი გავიდეს ოთხმხრივი მოლაპარაკებების პროცესიდან, რამაც შესაძლოა, კონფლიქტის მორიგი ესკალაცია გამოიწვიოს.

ექსპერტები ასევე არ გამორიცხავენ,. რომ სამეულის შეკრება იმ მომავალი გეგმების დასახვას ემსახურება, რომლის მეშვეობითაც, ევროპა აპირებს მორიგი ზეწოლა განახორციელოს პუტინზე, რათა მან სეპარატისტების დახმარება შეწყვიტოს და მძიმე შეიარაღება გაიყვანოს უკრაინის ტერიტორიიდან.
პოლიტოლოგები არ ვარაუდობენ, რომ შეხვედრის შედეგი რაიმე ფორმით შეცვლის მდგომარეობას, ეს ვერ მინსკის მოლაპარაკებებმა, ვერც "ნორმანდიულმა" თ "ჟენევის" ფორმატმა შესძლო - რუსეთი კვლავ აგრესიულად მოქმედებს და ამ პოლიტიკის შეცვლის ერთადერთი იმედი მისი ეკონომიკის მძიმე მდგომარეობაა, თუმცა არ დაგვავიწყდეს, რომ არანაკლებ კრიზისშია თავად უკრაინაც.