პროკურატურის მოწმე შსს-ს ინფორმატორია- რა ხდება "კორტების სპეცოპერაციის" საქმეზე სასამართლოში

სამართალი - 14:36, 19 Aug, 2015

1983

საქალაქო სასამართლოში დღეს ე. წ კორტების სპეცოპერაციის საქმესთან დაკავშირებით პოლიციის ყოფილი მაღალჩინოსნების სასამართლო პროცესი გაიმართა, რომელზეც ბრალდების მხარის მოწმეების დაკითხვა მოხდა. დღევანდელ სასამართლო სხდომაზე, ბრალდების ხუთი მოწმე დაიკითხა. ამათგან, ერთ-ერთი მოწმე , ამჟამად მსჯავრდებული მალხაზ დავლიანიძე იყო. რომელიც მისივე ინფორმაციით, წლების განმავლობაში შინაგან საქმეთა სამინისტროს ინფორმატორი იყო. როგორც ე. წ კორტების საქმეზე დაკავებულების ადვოკატი დავით ხაჟალია აცხადებს ბრალდების მოწმე დავლიანიძე სავარაუდოდ დღესაც აგრძელებს აღნიშნულ საქმიანობას.

„მოწმე დავლიანიძემ დაადასტურა, რომ ის არის შსს-ს ფარული თანამშრომელი. თანამშრომლობდა, როგორც გასულ წლებში, ალბათ თანამშრომლობს დღესაც. მისი ჩვენება აშკარად არადამაჯერებელია და ამას, ვფიქრობ სასამართლო არ შეაფასებს, როგორც მტკიცებულებას ბრალდების მიმართულებით. გარდა ამისა, ამ საკითხთან დაკავშირებით დაიკითხება მოწმე ირაკლი ქადაგიძე, რომლის შესახებაც, ასევე სასამართლომ გააკეთა განცხადება. რაც შეეხება დანარჩენ მოწმეებს სინდოიანის დას და სიძეს, მათ ჩვენებები არაფრის მომცემია, ისინი არ არიან თვითმხილველები, გადმოცემით რაღაც იციან, რასაც ვერ ადასტურებენ სხვა მტკიცებულებებით. მათ ასევე არ ჰქონდათ აუდიენცია სინდოიანის ადვოკატთან და მისგანაც ამ საქმესთან დაკავშირებით არაფერი იციან, რაც ერთობ საეჭვოა და მათი ჩვენებებიც არ შეიძლება განვიხილოთ როგორც მტკიცებულებები. ასევე არაფრის მომცემი იყო ექსპერტისა და თარჯიმნის ჩვენებები, ისინი არ შეიძლება შეფასებული იყოს ბრალის დამადასტურებელ მტკიცებულებებად.“- განაცხადა დავით ხაჟალიამ.