ვინ მფარველობს ე.წ კანონიერ ქურდს "სოხუმსკის" და ვისი ჩარევით გათავისუფლდა იგი პატიმრობიდან?

სამართალი - 18:06, 13 Aug, 2015

7442

დღეს, ზუგდიდში „თავისუფლების და მხარდაჭერის ცენტრის“ კოორდინატორმა ლევან თორიამ ბრიფინგი გამართა და ზუგდიდის რაიონული სასამართლოს გადაწყვეტილება გააპროტესტა, რომლის მიხედვითაც ე.წ კანონიერი ქურდი თემურ გვასალია, მეტსახელად „სოხუმსკი“ პატიმრობიდან გათავისუფლდა.

ლევან თორიას თქმით, „კანონიერი ქურდის“ დახმარებით დაინტერესებულები იყვნენ სამეგრელო-ზემო სვანეთის გუბერნატორი ლევან შონია და ზუგდიდის პოლიციის უფროსი კობა ხარებავა. ლევან თორიას განცხადებით სწორედ გუბერნატორის და პოლიციის უფროსის ჩარევით მიიღო „კანონიერმა ქურდმა“ გარანტია, რომ საქართველოს ტერიტორიის გავლით თურქეთში გადასვლას შეძლებდა. ამ მიზნით თემურ გვასალიას დამზადებული ჰქონდა ყალბი პირადობის დამადასტურებელი დოკუმენტი თემურ მურღულიას სახელით.

სასამართლო პროცესზე თემურ გვასალიამ განაცხადა, რომ იგი არ სცნობს საქართველოს კანონმდებლობას და არ უპასუხებდა სამართალდამცავების შეკითხვას, არის თუ არა იგი „კანონიერი ქურდი“.

ლევან თორიამ საქართველოს ხელისუფლება „კანონიერ ქურდების“ მფარველობაში დაადანაშაულა. მისივე განცხადებით, გვასალია არ არის პირველი კრიმინალური ავტორიტეტი, რომელიც საქართველს ტერიტორიიდან გაჰყავთ.

დღესვე ლევან თორიამ ამ საქმესთან დაკავშირებით არსებულ ბიზნეს ინტერესებზე ისაუბრა, მისი განცხადებით, გუბერნატორის და ზუგდიდის პოლიციის უფროსს გააჩნიათ ბიზნეს ინტერესების აფხაზეთის ტერიტორიაზე, რასაც ქურდული სამყაროს მხრიდან საფრთხე დაემუქრა, ამიტომ ისინი იძულებული გახდნენ „კანონიერ ქურდს“ დახმარებოდნენ.

თორიას ინფორმაციით დღეს, თემურ გვასალია საქართველოს ტერიტორიას დატოვებს.