დაამთავრეთ ეს ყველაფერი და მორჩით სპეკულაციებს - მაჭავარიანი ჟვანიას საქმეზე დაიკითხა

სამართალი - 17:51, 10 Aug, 2015

2443

ზურაბ ჟვანიას გარდაცვალების საქმეზე "ნაციონალური მოძრაობის" წევრი მიხეილ მაჭავარიანი დღეს ნაფიცი მსაჯულების პირობებში დაიკითხა. დეპუტატმა აღნიშნა, რომ იგი გამოძიების მასალებს ამ წლების განმავლობაში გაეცნო და გამოძიების ოფიციალურ ვერსიაში ეჭვი არ ეპარება.

მაჭავარიანმა ზურაბ ჟვანიას დაცვის ყოფილი წევრის ხარშილაძის და ყოფილი პრემიერის ურთიერთობზეც ისაუბრა და აღნიშნა რომ ისინი ახლო მეგობრები იყვნენ, ყოფილი პრემიერი კი დაცვის გარეშე ან დაცვის მხოლოდ ერთი წევრის თანხლებით ხშირად გადაადგილდებოდა.

„ამ თემასთან დაკავშირებით ჩემი ინტერესეია, რომ საბოლოოდ გაირკვეს სიმართლე და მორჩეს ეს სპეკულაციები. დაამთავრეთ ეს ყველაფერი და მორჩით სპეკულაციებს. ჩემთვის არანაირი კითხვის ნიშანი არ არსებობს, რომ ზურა უბედურ შემთხვევას შეეწირა, ყველაფერი იყო გამოკვლეული,“-განაცხადა მაჭავარიანმა.

მიხეილ მაჭავარიანის თქმით, ზურაბ ჟვანიას ჰქონდა საიდუმლო ბინები, სადაც იგი შეხვედრებს მართავდა და ეს მისთვისაც ცნობილი იყო.

"რამდენიმე ასეთ შეხვედრაზე მეც ვყოფილვარ. ჩემთვის ცნობილი იყო, რომ მას ჰქონდა საიდუმლო ბინები და ვიცოდი კონსპირაციული შეხვედრების შესახებაც. ის იყო პრემიერი და ასეთ შეხვედრებს მართავდა. უნდა დასრულდეს ეს სპეკულაციები. მე ეჭვი არ მეპარება ოფიციალური გამოძიების ვერსიაში", - განაცხადა მიხეილ მაჭავარიანმა.

დღევანდელ პროცესზე მაჭავარიანის დაკითხვა სამი საათის განმავლობაში გაგრძელდა. მიხეილ ძაძამიას და კობა ხარშილაძეს პროკურატურა სამსახურეობრივ გულგრილობას ედავება.