ე.წ. „კორტების სპეცოპერაციის“ დღევანდელ პროცესზე სამი მოწმე დაიკითხა. ორი ექსპერტი, ამათგან ერთი კრიმინალისტი, რომელიც უშუალოდ შემთხვევის ადგილის დათვალიერებაში იღებდა მონაწილეობას. მან დაადასტურა მანქანაში იარაღების არსებობა. ექსპერტმა დაადასტურა, რომ შემთხვევის ადგილის დათვალიერების ოქმს ხელი ნებაყოფლობით მოაწერა და მის მიმართ რაიმე სახის იძულებას ადგილი არ ჰქონია.

„მოწმეს არაფერი გაუგია საკონტროლო გასროლისა და მანქანაში იარაღების ჩადების შესახებ. მეორე მოწმე გახლდათ პოლიციის იმდროინდელი თანამშრომელი გულაღაშვილი, რომელმაც აღნიშნა, რომ შემთხევის ადგილზე შემთხვევით მოხვდა. გაიგონა გასროლების ხმა, თუმცა საკონტროლო გასროლები არც დაუნახავს და არც ის დაუდასტურებია, რომ ცააძემ გააკეთა. მოწმემ არაფერი იცის ავტომანქანაში იარაღების ჩადების შესახებ. რაც ყველაზე მნიშვნელოვანია, ის გახლდათ მაშინ მთაწმინდის რაიონის კრიმინალური პოლიციის ხელმძღვანელი, მას და არც მის სამმართველოს არ ჰქონდათ ინფორმაცია მათივე სამოქმედო ტერიტორიაზე ჩასატარებელი სპეცოპერაციის შესახებ, გამომდინარე აქედან, სპეცოპერაცია იმ ტერიტორიაზე დაგეგმილი არ იყო, მოხდა რაღაც, რამაც სპეცოპერაციის დაწყება გამოიწვია. მოწმემ ასევე დაადასტურა, რომ მის სამმართველოში სპეცოპერაციის ჩატარების დღეს დაჭრილი ქალბატონის შესახებ ინფორმაცია არ შესულა. მესამე დაკითხული მოწმე გახლდათ ზაზა ალთუნაშვილი, ის, იმ დროს მუშაობდა საექსპერტო კრიმინალისტიკური სამმართველოს უფროსის მოადგილის თანამდებობაზე. მან განაცხადა, რომ შემთხვევის ადგილზე ისიც შემთხვევით მოხვდა, იქ რამდენიმე წუთი დაჰყო და დაადასტურა ავტომანქანაში ცეცხლსასროლი იარაღების არსებობა. ალთუნაშვილმა აღნიშნა, რომ ცეცხლასროლ იარაღებს დამცავი მექანიზმები დაწეული ჰქონდათ, თუმცა ეს არაფერს არ ნიშნავს, რადგან მანამდე დაკითხულმა ექპერტმა განმარტა, ისინი შემთხვევის ადგილის დათვალიერების მიმდინარეობისას იარაღებს განმუხტავდნენ ხოლმე და შეიძლება იარაღები პოლიციელებსაც განემუხტათ“ - განმარტა ადვოკატმა დავით ხაჟალიამ.