საქალაქო სასამართლოში გარდაცვლილი ექსპრემიერის ზურაბ ჟვანიას დედა დაიკითხა. რემა ჟვანიამ მისი შვილის და დაცვის წევრების განსაკუთრებულ მეგობრულ ურთიერთობაზე ისაუბრა.

მისივე ინფორმაციით, ზურაბ ჟვანიას არაფორმალური შეხვედრებისთვის ბინა ნამდვილად ჰქონდა და გაიხსენა ექსპრემიერის დაცვის ყოფილი უფროსი კახა გოჩაშვილი.

"მინდა დაცვის ორ წევრზე შევაჩერო თქვენი ყურადღება. ეს არის კახა გოჩაშვილი და რეზო ქადაგიშვილი, ამათ შემდეგ უკვე იყო ხარშილაძე. როცა ამ ხალხს ვაბარებდი ზურას, აბსოლუტურად წყნარად ვიყავი. ვიცოდი, რომ სამივე, თუ საჭიროა სიცოცხლის ფასად დაიცავდნენ ზურას. ზურას არასაჯარო შეხვედრებისთვის ბინა ჰქონდა. იმ დღეს მიიღო თავისი სტუმარი. მას კახამ უთხრა, რომ იქვე ახლოს იქნებოდა და ყოველ 20 წუთში ერთხელ დაურეკავდა, თუ არ უპასუხებდა, კარს შეანგრევდა“, - განაცხადა რემა ჟვანიამ.

საქალაქო სასამართლოში ჟვანიას საქმეზე პროცესი ამ წუთებში მიმდინარეობს. დღევანდელ პროცესზე რაულ უსუპოვის მამის დაკითხვაც იგეგმება.