იემენის სამთვრობო ძალებმა ქვეყნის ყველაზე დიდ ავიაბაზაზე კონტროლი აღადგინა

მსოფლიო - 16:23, 04 Aug, 2015

1520

იემენში, სამთავრობო ჯარებმა ქვეყნის ყველაზე დიდ ალ-ანადის ავიაბაზაზე კონტროლი აღადგინეს. "ბიბისის" ცნობით, ამის შესახებ იემენის არმიის პრესსამსახური იტყობინება.
ბოლო რამდენიმე დღეა მიმდებარე ტერიტორიაზე ინტენსიური ბრძოლა მიმდინარეობდა. ალ-ანადის ავიაბაზა ამ დრომდე ჰუსიტ ამბოხებულებს ჰქონდათ დაკავებული.
იემენში უკვე რამდენიმე თვეა სამთავრობო ძალებსა და ამბოხებულებს შორის დაპირისპირება მიმდინარეობს. ინტენსიური ბრძოლის გამო ქვეყნის მთავრობა მუშაობას ვეღარ ახერხებს. მას შემდეგ, რაც 2011 წელს იემენში ხელისუფლება შეიცვალა, ქვეყანა პოლიტიკურ კრიზისში იმყოფება.

ყოფილი პრეზიდენტი, სალეჰი, ანტისამთავრობო გამოსვლების გამო გადადგა. სწორედ მას უჭერენ შიიტ ჰუსიტები მხარს. ამბოხებულებმა სექტემბერში დედაქალაქ სანაას დაკავება შეძლეს. მოქმედი პრეზიდენტი, მანსურ ჰადი იძულებული გახდა ქალაქ ადენში გადასულიყო და ის ქვეყნის დროებით დედაქალაქად გამოეცხადებინა. თუმცა, ამბოხებულებმა ადესაც შეუტიეს და სამხედრო ბაზა დაიკავეს. რის შემდეგაც, გავრცელდა ინფორმაცია, რომ პრეზიდენტმა ჰადიმ ქვეყანა დატოვა.

იემენის ხელისუფლებას არაბულმა ქვეყნებმა მხარდაჭერა გამოუცხადეს. კოალიციას საუდის არაბეთი ხელმძღვანელობდა, რომელიც აცხადებდა, რომ აჯანყებულების წინააღმდეგ სამხედრო მოქმედებებს მანამ არ შეწყვეტდნენ, სანამ ამბოხებულები იარაღს არ დაყრიდნენ.