ხვალ შეზღუდული შესაძლებლობების მქონე ბავშვების პრობლემებზე ისაუბრებენ

საზოგადოება - 22:57, 02 Mar, 2013

2603

სწორედ დედებს უწევთ იმ პრობლემებთან გამკლავება რაც საზოგადოებისა და სახელმწიფოს მხრიდან ყოველდღიურად ხვდებათ შშმ ადამიანებს. დედის დღეს გამართული პრესკონფერენციით, შშმ ბავშვთა დედები შეახსენებენ საზოგადოებას და ხელისუფლებას, რომ უნდა ვიყოთ ტოლერანტულები და სოლიდარულები ჩვენს გარშემო მცხოვრები შეზღუდული შესაძლებლობის მქონე თანამოქალაქეების მიმართ. საქართველოში, ოფიციალური სტატისტიკით, 150 00 ზე მეტი შეზღუდული შესაძლებლობის მქონე მოქალაქეა, არასამთავრობო ორგანიზაციების მონაცემებით კი მინიმუმ ორჯერ მეტი. საზოგადოებაში შშმ პირთა მიმართ შეინიშნება მწვავე სტიგმატიზაცია და გაუცხოება. ჯერ კიდევ, არ არსებობს სრულყოფილი საკანონმდებლო ბაზა, რომელიც უზრუნველყოფს შშმ ადამიანთა უფლებების დაცვას (მათ შორის არ არის რატიფიცირებული გაერო–ს კონვენცია შშმ ადამიანთა უფლებების შესახებ), რაც განაპირობებს ბევრ სხვა პრობლემას, როგორიცაა განათლების, ჯანმრთელობის და სოციალური დაცვის, დასაქმების ხელმისაწვდომობა. გარემო და ინფრასტრუქტურა არ არის ადაპტირებული საზოგადოებრივ ცხოვრებაში შშმ პირთა აქტიური და სრულფასოვანი მონაწილეობისათვის. საზოგადოებაში არსებობს „ინვალიდობასთან“ დაკავშირებული უამრავი სტერეოტიპი, რაც ერთის მხრივ არასწორ წარმოდგენას უყალიბებს საზოგადოებას, ხოლო მეორეს მხრივ თავად შშმ ადამიანთა იზოლაციას იწვევს. მედია საშუალებებს მხრიდან ხშირია დისკრიმინაციული გამონათქვამები, სფეროში მომუშავე არასამთავრობო ორგანიზაციის წარმომადგენლებიც ბოლო წლების განმავლობაში, გაურკვეველ დუმილს ინარჩუნებენ. პრესკონფერენციას სხვადასხვა არასამთავრობო ორგანიზაციების წარმომადგენლები და თავად შეზღუდული შესაძლებლობის მქონე ადამიანები დაესწრებიან.