ღამით, პრორუსი ტერორისტები უკრაინის არმიის პოზიციებს ბომბავდნენ

მსოფლიო - 12:24, 01 Aug, 2015

1455

1 აგვისტოს, ღამით, პრორუსი სეპარატისტები, მძიმე არტილერიის გამოყენებით, მასობრივ დაბომბვას ახორციელებდნენ გამყოფი ხაზის მთელ პერიმეტრზე, - აცხადებს უკრაინის ანტიტერორისტული ოპერაციების პრეს-ცენტრი.
"31 ივლისის 21:00 სთ-დან 1 აგვისტოს 03:30 სთ-მდე რუსული-ტერორისტული დაჯგუფებები ახორციელებდნენ მასშტაბურ დაბომბვას ლუგანსკისა და დონეცკის ოლქების ტერიტორიაზე არსებული გამყოფი ხაზის მთელს პერიმეტრზე. იბომბებოდა უკრაინის შეიარაღებული ძალების პოზიციები, აგრეთვე ფრონტისპირა ზონებთან მდებარე დასახლებულიუ პუნქტები - ავდევკა, ოპიტნოე, პესკი, მარიინკა, კრასნოგოროვკა, მაიორსკი, ლუგანსკოე, ზაიცევო და სხვ. შედეგად დაიჭრა ორი მშვიდობიანი მოქალაქე," - ნათქვამია განცხადებაში.
განცხადებაში ასევე აღნიშნულია, რომ დაბომბვა ხორციელდება იმ კლასის მძიმე შეიარაღების გამოყენებით, რომელიც მინსკის შეთანხმების თანახმად, დიდი ხნით ადრე უნდა ყოფილიყო გაყვანილი აღნიშნული ტერიტორიებიდან.
უკრაინული მხარე აცხადებს, რომ მიუხედავად არაერთი გაფრთხილებისა ტერორისტებმა ცეცხლი არ შეწყვიტეს, ხოლო რუსეთის წარმომადგენლობა აცხადებდა, რომ მათ არ აქვთ გავლენა ადგილობრივ ძალებზე. უკრაინულმა მხარემ აღნიშნულის შესახებ ეუთოს წარმომადგენლობას აცნობა.
უკრაინული მხარე ამ ფაქტს აფასებს, როგორც შეგნებულ პროვოკაციას, რომელიც მიმართულია კონფლიქტის ესკალაციისაკენ, რომელიც შეგნებულად დაემთხვა მინსკის მოლაპარაკებების მორიგ რაუნდს, რომელიც 3 აგვისტოს უნდა გაიმართოს. კიევის განცხადებით, აღნიშნული პროვოკაციის განმეორების შემდეგ ტერორისტები ადექვატურ პასუხს მიიღებე.