ერთი ქვეყანა სამართლიანობის ძიების გზაზე წინ ვერ აღგვიდგება

ერთი ქვეყანა სამართლიანობის ძიების გზაზე წინ ვერ აღგვიდგება - კემერონი რუსულ ვეტოზე

მსოფლიო - 14:03, 30 Jul, 2015

2079

დიდი ბრიტანეთის პრემიერ-მინისტრი, დევიდ კემერონი, უკრაინაში ჩამოგდებული მალაიზიური ავიალაინერის საქმეზე, გაეროს უშიშროების საბჭოს რეზოლუციაზე საერთაშორისო ტრიბუნალის შექმნაზე რუსეთის მიერ ვეტოს დადების ფაქტსაც გამოეხმაურა.

„სამართალმა უნდა იზეიმოს. არ დაგვავიწყდეს, რომ ასობით დაღუპულ მგზავრს შორის ბრიტანეთის მოქალაქეებიც იყვნენ. ჩვენ ვერ დავუშვებთ, რომ სამართლიანობისა და ჭეშმარიტების ძიების გზაზე ერთი ქვეყანა აღგვიდგეს წინ. თუკი საერთაშორისო ტრიბუნალის შექმნა არ შეგვიძლია, აუცილებლად უნდა მოვძებნოთ ალტერნატიული გზა“- განაცხადა კემერონმა.

შეგახსენებთ, რუსეთმა, უკრაინაში ჩამოგდებული მალაიზიური ავიალაინერის საქმეზე, გაეროს უშიშროების საბჭოს რეზოლუციაზე საერთაშორისო ტრიბუნალის შექმნას ვეტო დაადო. გაქნხილვაზე, ვიტალი ჩურკინმა ეჭვქვეშ დააყენა ტრიბუნალის მიუკერძოებელი მუშაობა.

რეზოლუცია მალაიზიური მხარის მიერ იყო ინიცირებული. რამდენიმე დღის წინ, ავსტრალიამ, ბელგიამ, ნიდერლანდებმა და უკრაინამ გაეროს უშიშროების საბჭოს საერთაშორისო ტრიბუნალის მოწვევის ინიციატივით მიმართეს, რათა ინციდენტთან დაკავშირებული ყველა პირი პასუხისგებაში მიეცეს. ინიციატივას მხარი დიდმა ბრიტანეთმაც დაუჭირა.

აღსანიშნავია, რომ კენჭისყრაზე უშიშროების საბჭოს წევრი 15 ქვეყნიდან გამოძიების ჩატარებას მხარი 11-მა დაუჭირა. სხდომას არ დასწრებიან ჩინეთის, ანგოლისა და ვენესუელის წარმომადგენლები.

შეგახსენებთ, ავიაკომპანია Malaysia Airlines-ის კუთვნილი თვითმფრინავი 2014 წლის 17 ივლისს უკრაინის ტერიტორიაზე ამბოხებულების მიერ კონტროლირებადი ტერიტორიიდან ჩამოაგდეს, რის შედეგად 298 ადამიანი, მათ შორის 18 ბავშვი გარდაიცვალა. პრორუსული რეპარატისტები კი ავიაკატასტროფაში კიევს ადანაშაულებენ.