ლიბიის ყოფილი ლიდერის, მოამარ კადაფის შვილს სეიფ ალ-ისლამს ლიბიის სასამართლომ სიკვდილით დასჯის განაჩენი გამოუტანა. საქმე ეხება 2011 წელს მშვიდობიანი დემონსტრანტების სიკვდილით დასჯას.

ტრიპოლის სასამართლომ იგივე განაჩენი ყოფილი მთავრობის კიდევ 30 მაღალჩნოსანს, მათ შორის დაზვერვის ყოფილ მეთაურს და ყოფილ პრემიერ-მინისტრს გამოუტანა.

კადაფის შვილი სასამართლო პროცესს არ დასწრებია, რადგან ყოფილ ამბოხებულებს ქალაქ ზინტანის ციხეში ჰყავთ გამომწყვდეული და ტრიპოლისთვის გადაცემაზე უარს აცხადებენ. მის წინააღმდეგ საქმე საერთაშორისო კრიმინალურ სასამართლოშიცაა აღძრული, რომლის მიხედვითაც ალ-ისლამი კადაფის მმართველობის დროს ქვეყანაში ყველაზე გავლენიანი ადამიანი იყო და ის ყველა მექანიზმით, მათ შორის ძალადობრივი გზებით ცდილობდა საპროტესტო აქციების ჩახშობას.