საქალაქო სასამართლოში ე.წ. კორტების სპეცოპერაციის საქმეზე რიგითმა სპეცრაზმელმა, ზურაბ ჯოხაძემ ჩვენების მიცემის დროს განაცხადა, რომ ვაზაგაშვილის მართვის ქვეშ მყოფ ავტომანქანას საბურავების მიმართულებით დაკავების მიზნით ესროლა, რადგან მისთვის წინასწარ იყო ცნობილი, ავტომანქანაში ყაჩაღები და ბანდიტები ისხდნენ.

მან, ასევე განაცხადა, რომ დაკავებამდე, განახლებული გამოძიების პირობებში, ის არავის დაუკითხავს, რაზეც დაცვის მხარემ მიმართა შემდეგი კითხვით:

„თუ თქვენ 2014 წლის 2 თებერვლამდე არავის დაუკითხიხართ, მაშინ დაკავების დღეს რატომ არ განაცხადეთ პროკურატურაში ის, რასაც დღეს ყვებით?

რაზეც მოწმემ უპასუხა, რომ როცა კითხეს მაშინ მოყვა. ჯოხაძემ ასევე დაადასტურა, რომ ავტომანქანაში უკან მჯდომ პირს გადმოყვანისას ცეცხლასროლი იარაღი, კერძოდ, მაკაროვის სისტემის იარაღი გადმოუვარდა.

ზურაბ ჯოხაძემ, სასამართლო პროცესზე ასევე განაცხადა, რომ მან ჭორის დონეზე გაიგო, თითქოს ცააძეს შემთხვევის ადგილზე გაუვარდა. თუმცა აღნიშნული არ დაუნახავს, მას ასევე არ დაუნახავს ცააძის მიერ „საკონტროლო“ გასროლები.

დაცვის კითხვაზე, იყო თუ არა აღნიშნული სპეცოპერაცია სახელმწიფოს მიერ გამოცხადებული ნულოვანი ტოლერანტობის იდეის ფარგლებში, ჯოხაძემ აღნიშნული ვერ დაადასტურა.

ცნობისთვის პროკურატურის მიერ წარდგენილ ბრალში ვკითხულობთ, რომ აღნიშნული სპეცოპერაცია გამომდინარეობდა იმ პერიოდში სამართალდამცავ ორგანოებში დამკვიდრებული დანაშაულთან ბრძოლის ნულოვანი ტოლერანტობისა და კრიმინალთან ბრძოლისათვის სასტიკი მეთოდების პროპაგანდიდან, რაც გულისხმობდა წინასწარ „დამნაშავედ“ მონათლული პირების ლიკვიდაციას.